Aqyn Ábýbákir Qaıran – 60 jasta!
Shubattan shyqqan…
Ábýbákir Qaıranǵa
Sheńgelmen oınap,
Jantaqta jatqan jantaıyp,
Ýyzǵa toıǵan
Botadaı bula, balpaıyp,
Tártipti topta
Túsedi kózge tulǵasy,
Tarbaǵataıdyń
Tasyndaı qojyr talpaıyp.
Aınalǵan óleń,
Baıyrǵy balbal qaıda der,
Aq boran soǵyp,
Aıtqandaı sálem aıǵa jer,
Qaıran el joǵyn
Ýaıymdap jyrmen izdegen,
Qaınary móldir,
Qaıraǵy qatty qaıran er!
Qolqany qaýyp,
Juldyzsyz túni qalanyń,
Aqynnyń beıýaq
Taýyspaı qoımas amalyn,
Toıotadan da
Taı-atan artyq kórinip,
Trotýar teýip,
Izdegen túıe tabanyn.
Túıeshi shaldyń
Túgesip ishken shubatyn,
Daladaı aqyn
Dalada ǵana týatyn,
Qazaqy sózdiń
Máıegi sińgen maıtalman,
Qymyzdan, ıakı,
Shubattan ǵana shyǵatyn!
Tabıǵı qalpyn
Buzbaǵan búlde jamylyp,
Kóleńke túsip,
Kórmegen ishi tarylyp,
Túıeniń súti,
Kıeli quty dem berip,
Aǵarǵan iship,
Aǵynan júrgen jarylyp,
Qabaǵy túsip,
Qabarjyp keıde qulazyp,
Qabyrǵa – qamal,
Buzǵysy kelip qaǵynyp,
Burqyrap býy,
Shýdasy týdaı jalbyrap ,
Qańtarda qaınap,
Býradaı bultqa shabynyp,
Azýy qaqsap,
Aıaǵy aqsap qaqpannan,
Shyqsa da asqaq,
Qasqyrdaı kókke tabynyp,
Asyǵyp qýyp
Adasyp qalsa saǵymnan ,
Asyra jyrlap,
Aspanyn júrgen saǵynyp,
Jol uzaq, áli,
Órleı ber, aqyn, aldyńda,
Ómirdiń bári
Aǵyn bop… óleń aǵylyp!
Aspan
Býra bulttar
Jerge tónip
Kók qursap,
Eske tústi
Burynǵy bir ótkir shaq,
Tunjyr oıǵa
Batyratyn osylaı
Ózimiz de
Bulyńǵyrlaý bop tursaq.
Aq qaǵazǵa túspegenmen
Dastan bop,
Tańǵajaıyp sátter ótti
Bastan kóp,
Ábýbákir
Aqyn inim ekeýmiz,
Túngi baqty
Kezýshi edik mastaý bop,
Appaq qarǵa
Aýnap jata ketýshi ek
Óleń oqyp ,
“Aspan! Aspan! Aspan!”-dep.
Qylmystyq top
Aqyn Ábýbákir Qaıranovtyń Almatydaǵy Mamyr yqsham aýdanyndaǵy úıinde aqyndar jıi bas qosyp,poezııa keshterin ótkizip turady.Bir joly Semeıden aqyn Tynyshtyqbek Ábdikákimov kelipti.Olarǵa sálem bere kelgen jas aqyndar qandaı, emin-erkin bir juma dúrildetse kerek. Bir kúni Baıanǵalı zvondasa,telefondy Ábýbákirdiń sabyrly, parasatty zaıyby Gúlzııa alyp, bolǵan jaıdy aıtady. Sonda Baıanǵalı.
Qosylsa Ábýbákir,Tynyshtyqbek,
Ketedi qańtarda da kún ystyq bop,
Mamyrdy azan-qazan qylady eken
Sekildi basyn qosqan qylmystyq top!—degen eken.
Úsh qatyn men kúshti aqyn
Aqyn Ábýbákir Qaıran telefon arqyly sóıleskende:
-Gúlzııa Semeıge toıǵa ketti. Qasynda Ǵanımat qudaǵı, taǵy bir áıel bar –depti. Sonda Baıanǵalı:
Toıǵa ketti úsh qatyn,
Úıde qaldy kúshti aqyn,
Endi qandaı amal bar
Otyryp al da, qys taqym! – degen eken.
Baıanǵalı Álimjanov,
Qazaq úni