اقىن ابۋباكىر قايران – 60 جاستا!
شۇباتتان شىققان…
ابۋباكىر قايرانعا
شەڭگەلمەن ويناپ،
جانتاقتا جاتقان جانتايىپ،
ۋىزعا تويعان
بوتاداي بۇلا، بالپايىپ،
ءتارتىپتى توپتا
تۇسەدى كوزگە تۇلعاسى،
تارباعاتايدىڭ
تاسىنداي قوجىر تالپايىپ.
اينالعان ولەڭ،
بايىرعى بالبال قايدا دەر،
اق بوران سوعىپ،
ايتقانداي سالەم ايعا جەر،
قايران ەل جوعىن
ۋايىمداپ جىرمەن ىزدەگەن،
قاينارى ءمولدىر،
قايراعى قاتتى قايران ەر!
قولقانى قاۋىپ،
جۇلدىزسىز ءتۇنى قالانىڭ،
اقىننىڭ بەيۋاق
تاۋىسپاي قويماس امالىن،
تويوتادان دا
تاي-اتان ارتىق كورىنىپ،
تروتۋار تەۋىپ،
ىزدەگەن تۇيە تابانىن.
تۇيەشى شالدىڭ
تۇگەسىپ ىشكەن شۇباتىن،
دالاداي اقىن
دالادا عانا تۋاتىن،
قازاقى ءسوزدىڭ
مايەگى سىڭگەن مايتالمان،
قىمىزدان، ياكي،
شۇباتتان عانا شىعاتىن!
تابيعي قالپىن
بۇزباعان بۇلدە جامىلىپ،
كولەڭكە ءتۇسىپ،
كورمەگەن ءىشى تارىلىپ،
تۇيەنىڭ ءسۇتى،
كيەلى قۇتى دەم بەرىپ،
اعارعان ءىشىپ،
اعىنان جۇرگەن جارىلىپ،
قاباعى ءتۇسىپ،
قابارجىپ كەيدە قۇلازىپ،
قابىرعا – قامال،
بۇزعىسى كەلىپ قاعىنىپ،
بۇرقىراپ بۋى،
شۋداسى تۋداي جالبىراپ ،
قاڭتاردا قايناپ،
بۋراداي بۇلتقا شابىنىپ،
ازۋى قاقساپ،
اياعى اقساپ قاقپاننان،
شىقسا دا اسقاق،
قاسقىرداي كوككە تابىنىپ،
اسىعىپ قۋىپ
اداسىپ قالسا ساعىمنان ،
اسىرا جىرلاپ،
اسپانىن جۇرگەن ساعىنىپ،
جول ۇزاق، ءالى،
ورلەي بەر، اقىن، الدىڭدا،
ءومىردىڭ ءبارى
اعىن بوپ… ولەڭ اعىلىپ!
اسپان
بۋرا بۇلتتار
جەرگە ءتونىپ
كوك قۇرساپ،
ەسكە ءتۇستى
بۇرىنعى ءبىر وتكىر شاق،
تۇنجىر ويعا
باتىراتىن وسىلاي
ءوزىمىز دە
بۇلىڭعىرلاۋ بوپ تۇرساق.
اق قاعازعا تۇسپەگەنمەن
داستان بوپ،
تاڭعاجايىپ ساتتەر ءوتتى
باستان كوپ،
ابۋباكىر
اقىن ءىنىم ەكەۋمىز،
تۇنگى باقتى
كەزۋشى ەدىك ماستاۋ بوپ،
اپپاق قارعا
اۋناپ جاتا كەتۋشى ەك
ولەڭ وقىپ ،
“اسپان! اسپان! اسپان!”-دەپ.
قىلمىستىق توپ
اقىن ابۋباكىر قايرانوۆتىڭ الماتىداعى مامىر ىقشام اۋدانىنداعى ۇيىندە اقىندار ءجيى باس قوسىپ،پوەزيا كەشتەرىن وتكىزىپ تۇرادى.ءبىر جولى سەمەيدەن اقىن تىنىشتىقبەك ابدىكاكىموۆ كەلىپتى.ولارعا سالەم بەرە كەلگەن جاس اقىندار قانداي، ەمىن-ەركىن ءبىر جۇما دۇرىلدەتسە كەرەك. ءبىر كۇنى بايانعالي زۆونداسا،تەلەفوندى ابۋباكىردىڭ سابىرلى، پاراساتتى زايىبى گۇلزيا الىپ، بولعان جايدى ايتادى. سوندا بايانعالي.
قوسىلسا ابۋباكىر،تىنىشتىقبەك،
كەتەدى قاڭتاردا دا كۇن ىستىق بوپ،
مامىردى ازان-قازان قىلادى ەكەن
سەكىلدى باسىن قوسقان قىلمىستىق توپ!—دەگەن ەكەن.
ءۇش قاتىن مەن كۇشتى اقىن
اقىن ابۋباكىر قايران تەلەفون ارقىلى سويلەسكەندە:
-گۇلزيا سەمەيگە تويعا كەتتى. قاسىندا عانيمات قۇداعي، تاعى ءبىر ايەل بار –دەپتى. سوندا بايانعالي:
تويعا كەتتى ءۇش قاتىن،
ۇيدە قالدى كۇشتى اقىن،
ەندى قانداي امال بار
وتىرىپ ال دا، قىس تاقىم! – دەگەن ەكەن.
بايانعالي ءالىمجانوۆ،
قازاق ءۇنى
