QR Prezıdenti jarlyǵymen Almatynyń irgesinde bolǵan tótenshe oqıǵa kezinde oqystan qaza tapqan órt sóndirýshi Arslan Qurmanbekov III dárejeli «Aıbyn» ordenimen marapattaldy, dep habarlaıdy "Adyrna" ulttyq portaly.
«Memleket basshysynyń Jarlyǵymen qyzmettik boryshyn atqarýda kórsetken batyldyǵy men janqııarlyǵy úshin Tótenshe jaǵdaılar mınıstrliginiń Almaty qalasy Tótenshe jaǵdaılar departamenti órt sóndirý jáne avarııalyq-qutqarý jumystary qyzmeti №7 órt sóndirý bóliminiń aǵa órt sóndirýshi-qutqarýshysy Arslan Joldasbekuly Qurmanbekov III dárejeli «Aıbyn» ordenimen nagradtaldy (marqum)», - dep jazdy Aqordanyń resmı saıty.
Arslan Joldasbekuly Qurmanbekov – azamattyq qorǵanys serjanty.
1994 jyly 23 tamyzda Almaty oblysy, Talǵar aýdany, Talǵar qalasynda dúnıege kelgen.
Eńbek jolyn Almaty qalasy TJD «ÓSjAQJQ» MM №9 mamandandyrylǵan órt sóndirý bóliminde órt sóndirýshi-qutqarýshy retinde bastaǵan.
Almaty qalasy TJD «ÓSjAQJQ» MM №1 órt sóndirý bóliminde órt sóndirýshi, aǵa órt sóndirýshi-qutqarýshy bolyp qyzmet atqarǵan.
Tótenshe jaǵdaılar mınıstrligi Almaty qalasy Tótenshe jaǵdaılar departamenti órt sóndirý jáne avarııalyq-qutqarý jumystary qyzmeti №7 órt sóndirý bóliminiń aǵa órt sóndirýshi-qutqarýshysy laýazymyna 2019 jyly taǵaıyndalǵan.
Bıyl 8 mamyrda Arslan Qurmanbekov Ile-Alataý tabıǵı parkiniń taý bókterindegi órtti sóndirgen jedel toptyń quramynda qyzmettik boryshyn atqara júrip, qaıǵyly jaǵdaıda qaza tapty.
"Adyrna" ulttyq portaly
