(Mereısóz)
Sonaý stýdent kezimizde sabaq ústinde bizge beımálim tulǵalardyń esimderin atap, bárimizdi únemi eleńdetip otyratyn bir ustazymyz boldy. Shynymyzdy aıtsaq, máseleniń mán-jaıyn jóndi uǵynyp jarytpaımyz. Biraq tereńde jatqan qasterli qazynanyń kiltin kórsetip turǵanyn sezinetin sııaqtymyz. Aqtalmaq túgili, esimderin eske alýǵa da tyıym salynǵan kezeńde Alash arystary jáne olardyń jekelegen shyǵarmalary týraly tam-tumdap málimet bergen ardaqty aǵaıymyzdyń aty-jóni Seıdilda Ordalıev edi. Maıtalman ádebıettanýshy. Ádebıet tarıhynyń bilgiri. Al endi bilimi kól-kósir. Eshkimnen yqpaıdy, eń bolmasa sybyrlap ta sóılemeıdi. Ór minezimen, óktem daýsymen, qalypty ahýaldy buzyp-jaryp, ádebıet tarıhynyń aqtańdaqtaryn aqtary-e-e-ep otyrady. Ol kezde basqa birde-bir oqytýshymyz bul taqyrypqa tótelep te, qııalap ta barǵan emes. Parasatty professorlar da, dúrdeı doentter de tek tıisti sabaqtaryn ótkizgendi ǵana biletin. Sóıtip, ıntýıııasy ǵalamat, batyldyǵyna kisi qyzyǵatyn, júrek jutqan Ordalıev siresken sekseninshi jyldarda-aq oı-sanamyzdy oıata bastady.
Keıin sol aǵaıymyzdyń perzenti Janat Seıdildaqyzymen qyzmettes boldyq. Onyń naǵyz asyldyń synyǵy ekenine talaı ret kózimiz jetti. Jurtqa jaqsylyq jasaýdan jalyqpaıdy. Jan balasyna jamandyq oılamaıdy. Zııalynyń zııalysy. Ǵıbratty ǵalym. Óreli ónertanýshy. Mártebeli memlekettik qyzmetshi. Qaı sharýany da shyrq úıiredi. Eń bastysy, adamı qalpyn saqtaǵan jan. Bul qasıetteriniń oǵan bizdiń ulaǵatty ustazymyzdan daryǵanyna daý joq.
Jurttyń bárin jan jylýyna bólep júretin áıáı qyz búgin áıbat jasqa toldy. Quttyqtaımyz, Janat! Mereıińiz ústem bola bersin!
Baýyrjan OMARULY
