جاقسىنىڭ ءسوزى

2193
Adyrna.kz Telegram

(مەرەيسوز)

سوناۋ ستۋدەنت كەزىمىزدە ساباق ۇستىندە بىزگە بەيمالىم تۇلعالاردىڭ ەسىمدەرىن اتاپ، ءبارىمىزدى ۇنەمى ەلەڭدەتىپ وتىراتىن ءبىر ۇستازىمىز بولدى. شىنىمىزدى ايتساق، ماسەلەنىڭ ءمان-جايىن ءجوندى ۇعىنىپ جارىتپايمىز. بىراق تەرەڭدە جاتقان قاستەرلى قازىنانىڭ كىلتىن كورسەتىپ تۇرعانىن سەزىنەتىن سياقتىمىز. اقتالماق تۇگىلى، ەسىمدەرىن ەسكە الۋعا دا تىيىم سالىنعان كەزەڭدە الاش ارىستارى جانە ولاردىڭ جەكەلەگەن شىعارمالارى تۋرالى تام-تۇمداپ مالىمەت بەرگەن ارداقتى اعايىمىزدىڭ اتى-ءجونى سەيدىلدا ورداليەۆ ەدى. مايتالمان ادەبيەتتانۋشى. ادەبيەت تاريحىنىڭ بىلگىرى. ال ەندى ءبىلىمى كول-كوسىر. ەشكىمنەن ىقپايدى، ەڭ بولماسا سىبىرلاپ تا سويلەمەيدى. ءور مىنەزىمەن، وكتەم داۋسىمەن، قالىپتى احۋالدى بۇزىپ-جارىپ، ادەبيەت تاريحىنىڭ اقتاڭداقتارىن اقتارى-ە-ە-ەپ وتىرادى. ول كەزدە باسقا بىردە-ءبىر وقىتۋشىمىز بۇل تاقىرىپقا توتەلەپ تە، قيالاپ تا بارعان ەمەس. پاراساتتى پروفەسسورلار دا، دۇردەي دوتسەنتتەر دە تەك ءتيىستى ساباقتارىن وتكىزگەندى عانا بىلەتىن. ءسويتىپ، ينتۋيتسياسى عالامات، باتىلدىعىنا كىسى قىزىعاتىن، جۇرەك جۇتقان ورداليەۆ سىرەسكەن سەكسەنىنشى جىلداردا-اق وي-سانامىزدى وياتا باستادى.
كەيىن سول اعايىمىزدىڭ پەرزەنتى جانات سەيدىلداقىزىمەن قىزمەتتەس بولدىق. ونىڭ ناعىز اسىلدىڭ سىنىعى ەكەنىنە تالاي رەت كوزىمىز جەتتى. جۇرتقا جاقسىلىق جاساۋدان جالىقپايدى. جان بالاسىنا جاماندىق ويلامايدى. زيالىنىڭ زيالىسى. عيبراتتى عالىم. ورەلى ونەرتانۋشى. مارتەبەلى مەملەكەتتىك قىزمەتشى. قاي شارۋانى دا شىرق ۇيىرەدى. ەڭ باستىسى، ادامي قالپىن ساقتاعان جان. بۇل قاسيەتتەرىنىڭ وعان ءبىزدىڭ ۇلاعاتتى ۇستازىمىزدان دارىعانىنا داۋ جوق.

جۇرتتىڭ ءبارىن جان جىلۋىنا بولەپ جۇرەتىن ءاياي قىز بۇگىن ءايبات جاسقا تولدى. قۇتتىقتايمىز، جانات! مەرەيىڭىز ۇستەم بولا بەرسىن!

باۋىرجان ومارۇلى

پىكىرلەر