Qazaqtyń astanasynda ana tilin bilmeıtin "shalaqazaqtar" daıyndalyp jatyr ma?

3966
Adyrna.kz Telegram

Nur-Sultan qalasynda 36 qazaq mektebi, 53 aralas mektep, 18 taza orys tilinde bilim beretin mektep bar. Aralas mektep degen aty ǵana, onda negizinen basymdyq orys tiline beriletini aıdan anyq dúnıe. Sol aralas mektepter qalanyń qaq ortasynda, jańadan salynǵan, jaǵdaılary óte jaqsy ǵımarattarda ornalasqan.

Taza qazaq mektepteriniń kóbi shetpushpaqtaǵan, qalanyń ana sheti, myna sheti, ıtólgen mekenderde ǵana ashylǵan. Iaǵnı, arzan páter jaldaǵan, bazar jaǵalaǵan jarly-jaqybaılar men ár oblystan kóship kelip, áli bul qalaǵa sińisti bola almaǵandardyń mekeni. Aralas mektepter qalanyń eń kórikti jerlerinde, baı-baǵlandardyń, basshy, qosshy, sheneýnikterdiń maı kekirip jatqan súıikti aýmaqtarynda ornalasqan. Olardyń balalary aralas ne orys mektepterinde oqıdy. Sebebi, memleket saıasatynyń astaryn da, búgingi baǵyt-baǵdaryn da kórip, sezip otyrǵan jańa qazaqtar balalaryn oryssha oqytady.

Óıtkeni qazaq tiliniń bolashaǵyna ata-analary da senbeıdi! Al bizdiń memlekettiń «másiniń qonyshyn kesip kebis qylǵan» qojanasyr saıasatyn qarańyz! Qalalyq bilim basqarmasynyń bir sharýasyna Bilim jáne ǵylym mınıstrligi aralasa almaıdy! Ákimdik – jarty patshalyq! Ol az deseńiz, qalanyń bilim basqarmasyna qaramaıtyn Nazarbaev zııatkerlik mektepteri, jekemenshik mektepter qazaq tiliniń kósegesin kógertip otyr deı alasyz ba?! Osy jaqynda ǵana Nur-Sultannyń qaq ortasynda ashylǵan 89, 91- mektepterdi qala ákimi Altaı Kólginov ashty, olar da aralas!!! 92 – mektepti aralas jasamaq.

Altaı myrza, qazaq memleketiniń bolashaǵyna balta shappaý kerek jáne ol balta "Bolashaqpen" oqyp kelgen azamattyń qolymen shabylmaýy kerek.

Dáýletkereı KÁPULYNYŃ

feısbýk paraqshasynan 

Pikirler