Óskemen qalalyq máslıhatynyń depýtaty Nadejda Shýshanıkova barsha áriptesteri men atqaminerlerge usynys bildirdi. Budan keıingi máslıhat sessııasyn memlekettik tilde ótkizýdi usyndy, dep habarlady "Adyrna" ulttyq portaly.
Óskemende VIII saılanǵan qala máslıhaty depýtattarynyń alǵashqy otyrysy ótti. Alqasózde bir mandatty №11 saılaý okrýgi boıynsha saılanǵan depýtat Nadejda Shýshanıkova kópshilikke qarata usynys bildirdi.
- Qazaq elinde turǵandyqtan keıin kelesi sessııamyzdy memlekettik tilde ótkizsek qalaı qaraısyzdar, - dedi depýtat.
Depýtattyń pikirin tyńdaǵan Óskemen qalasynyń ákimi Jaqsylyq Omar muny depýtattyń ǵana emes, qoǵamnyń suranysy dep baǵalady.
Depýtat Kazınform saıtyna suhbat berip, óz usynysynyń qoǵamdyq-caıası mán-mańyzyn bylaı túsindirdi:
«Máslıhat depýtattarynyń alǵashqy otyrysynda kelesi sessııany qazaq tilinde ótkizýge usynys jasadym. Sebebi biz qazaq elinde turatynymyzdy, memlekettik til – qazaq tili ekendigin umytpaýymyz kerek. Memlekettik mekemelerdegi jınalystar, sharalar tek qazaqsha ótýi tıis. Ókinishke qaraı, keıbir sheneýnikter qazaq tilinde eki sózdiń basyn qosa almaı jatady. Bul uıat qoı!», - deıdi Nadejda Shýshanıkova.
Nadejda Shýshanıkova Zaısan qalasynyń týmasy. Zaısan qalasyndaǵy M.Lomonosov atyndaǵy orys mektebin bitirip, S.Amanjolov atyndaǵy Shyǵys Qazaqstan memlekettik ýnıversıtetiniń qazaq fılologııasy fakýltetinde bilim alǵan. Qazir Nadejda Shýshanıkova O. Bókeı atyndaǵy kitaphanada «Kel, sóıleseıik» atty qazaq tili klýbynda sabaq beredi. Oqýshylarǵa, eresekterge memlekettik tildi úıretedi.
"Adyrna" ulttyq portaly