نۇر-سۇلتان قالاسىندا 36 قازاق مەكتەبى، 53 ارالاس مەكتەپ، 18 تازا ورىس تىلىندە ءبىلىم بەرەتىن مەكتەپ بار. ارالاس مەكتەپ دەگەن اتى عانا، وندا نەگىزىنەن باسىمدىق ورىس تىلىنە بەرىلەتىنى ايدان انىق دۇنيە. سول ارالاس مەكتەپتەر قالانىڭ قاق ورتاسىندا، جاڭادان سالىنعان، جاعدايلارى وتە جاقسى عيماراتتاردا ورنالاسقان.
تازا قازاق مەكتەپتەرىنىڭ كوبى شەتپۇشپاقتاعان، قالانىڭ انا شەتى، مىنا شەتى، يتولگەن مەكەندەردە عانا اشىلعان. ياعني، ارزان پاتەر جالداعان، بازار جاعالاعان جارلى-جاقىبايلار مەن ءار وبلىستان كوشىپ كەلىپ، ءالى بۇل قالاعا ءسىڭىستى بولا الماعانداردىڭ مەكەنى. ارالاس مەكتەپتەر قالانىڭ ەڭ كورىكتى جەرلەرىندە، باي-باعلانداردىڭ، باسشى، قوسشى، شەنەۋنىكتەردىڭ ماي كەكىرىپ جاتقان سۇيىكتى اۋماقتارىندا ورنالاسقان. ولاردىڭ بالالارى ارالاس نە ورىس مەكتەپتەرىندە وقيدى. سەبەبى، مەملەكەت ساياساتىنىڭ استارىن دا، بۇگىنگى باعىت-باعدارىن دا كورىپ، سەزىپ وتىرعان جاڭا قازاقتار بالالارىن ورىسشا وقىتادى.
ويتكەنى قازاق ءتىلىنىڭ بولاشاعىنا اتا-انالارى دا سەنبەيدى! ال ءبىزدىڭ مەملەكەتتىڭ «ءماسىنىڭ قونىشىن كەسىپ كەبىس قىلعان» قوجاناسىر ساياساتىن قاراڭىز! قالالىق ءبىلىم باسقارماسىنىڭ ءبىر شارۋاسىنا ءبىلىم جانە عىلىم مينيسترلىگى ارالاسا المايدى! اكىمدىك – جارتى پاتشالىق! ول از دەسەڭىز، قالانىڭ ءبىلىم باسقارماسىنا قارامايتىن نازارباەۆ زياتكەرلىك مەكتەپتەرى، جەكەمەنشىك مەكتەپتەر قازاق ءتىلىنىڭ كوسەگەسىن كوگەرتىپ وتىر دەي الاسىز با؟! وسى جاقىندا عانا نۇر-سۇلتاننىڭ قاق ورتاسىندا اشىلعان 89, 91- مەكتەپتەردى قالا اكىمى التاي كولگىنوۆ اشتى، ولار دا ارالاس!!! 92 – مەكتەپتى ارالاس جاساماق.
التاي مىرزا، قازاق مەملەكەتىنىڭ بولاشاعىنا بالتا شاپپاۋ كەرەك جانە ول بالتا "بولاشاقپەن" وقىپ كەلگەن ازاماتتىڭ قولىمەن شابىلماۋى كەرەك.
فەيسبۋك پاراقشاسىنان
