Rýhy myqty, qaıraty kemel azamattar myqty memleket qalyptastyrady.
Oǵan ásirese óner men mádenıettegi talanttardyń, jazýshylar men aqyndardyń, ǵalymdar men sportshylardyń qosar úlesteri orasan zor. Sonyń ishinde ásirese olımpıada sportshylarynyń orny bólek.
Ókinishke oraı, búginde Tokıo olımpıadasyndaǵy keıbir sportshylarymyzdyń sátsizdigine kópshilik jaǵymsyz pikirlermen tym ádiletsiz syn aıtyp jatyr. Onyń ishinde buǵan deıingi jarystarda elimizdiń atyn tórtkúl dúnıege tanytyp júrgen tanymal atletterimiz de aty atalýda.
Mysaly 2016 jyly Rıo Olımpıadasynda Vasılıı Levıttiń rıngtegi ónerine búkil elimiz tamsandy, oǵan kórsetilgen ádiletsizdikke birge jandary aýyrdy. Osy joly Vasılıı jeńildi, biraq onyń osy bes jyl ishinde elimiz úshin daıyndalyp, kezekti olımpıadalyq ıklden ótip, rıngke qaıta shyǵýynyń ózi qurmetteýge turarlyq sheshim dep sanaımyn.
Olga Rypakovanyń da sátsizdigi men onyń kásibı karerasyn aıaqtaldy degen aqparat kóńilge tipti qaıaý túsiredi. Olga búkil sanaly ǵumyryn otandyq sport jolyna arnap, elimizdiń atyn talaı márte dúbirli dodalarda asqaqtatqan birden bir jeńil atlet. Ol 36 jasynda óziniń tórtinshi Olımpıadasyna qatysyp, elimizdiń namysyn kezekti ret qorǵaýǵa sheshim qabyldady.
Olar úlken sporttaǵy karerasyn aıaqtaǵanymen aldaǵy ýaqytta ózderiniń izin basar shákirt tárbıeleýde úlken eńbek etedi dep senemin.
Sondyqtan qandaı jaǵdaıda da uly sportshylarymyzdyń jetistikteri men jeńisterin biz eshqashan umytpaýymyz kerek. Qıyn sátterde qoldaý kórsetý arqyly ǵana biz olarǵa senim uıalatyp, keler kúnderdiń jeńisterinen úmit ete alamyz.
Biz úshin bizdiń sportshylardyń barlyǵy da naǵyz Chempıondar!
Aıda BALAEVANYŃ facebook paraqshasynan
