رۋحى مىقتى، قايراتى كەمەل ازاماتتار مىقتى مەملەكەت قالىپتاستىرادى.
وعان اسىرەسە ونەر مەن مادەنيەتتەگى تالانتتاردىڭ، جازۋشىلار مەن اقىنداردىڭ، عالىمدار مەن سپورتشىلاردىڭ قوسار ۇلەستەرى وراسان زور. سونىڭ ىشىندە اسىرەسە وليمپيادا سپورتشىلارىنىڭ ورنى بولەك.
وكىنىشكە وراي، بۇگىندە توكيو وليمپياداسىنداعى كەيبىر سپورتشىلارىمىزدىڭ ساتسىزدىگىنە كوپشىلىك جاعىمسىز پىكىرلەرمەن تىم ادىلەتسىز سىن ايتىپ جاتىر. ونىڭ ىشىندە بۇعان دەيىنگى جارىستاردا ەلىمىزدىڭ اتىن تورتكۇل دۇنيەگە تانىتىپ جۇرگەن تانىمال اتلەتتەرىمىز دە اتى اتالۋدا.
مىسالى 2016 جىلى ريو وليمپياداسىندا ۆاسيلي لەۆيتتىڭ رينگتەگى ونەرىنە بۇكىل ەلىمىز تامساندى، وعان كورسەتىلگەن ادىلەتسىزدىككە بىرگە جاندارى اۋىردى. وسى جولى ۆاسيلي جەڭىلدى، بىراق ونىڭ وسى بەس جىل ىشىندە ەلىمىز ءۇشىن دايىندالىپ، كەزەكتى وليمپيادالىق تسيكلدەن ءوتىپ، رينگكە قايتا شىعۋىنىڭ ءوزى قۇرمەتتەۋگە تۇرارلىق شەشىم دەپ سانايمىن.
ولگا رىپاكوۆانىڭ دا ساتسىزدىگى مەن ونىڭ كاسىبي كارەراسىن اياقتالدى دەگەن اقپارات كوڭىلگە ءتىپتى قاياۋ تۇسىرەدى. ولگا بۇكىل سانالى عۇمىرىن وتاندىق سپورت جولىنا ارناپ، ەلىمىزدىڭ اتىن تالاي مارتە ءدۇبىرلى دودالاردا اسقاقتاتقان بىردەن ءبىر جەڭىل اتلەت. ول 36 جاسىندا ءوزىنىڭ ءتورتىنشى وليمپياداسىنا قاتىسىپ، ەلىمىزدىڭ نامىسىن كەزەكتى رەت قورعاۋعا شەشىم قابىلدادى.
ولار ۇلكەن سپورتتاعى كارەراسىن اياقتاعانىمەن الداعى ۋاقىتتا وزدەرىنىڭ ءىزىن باسار شاكىرت تاربيەلەۋدە ۇلكەن ەڭبەك ەتەدى دەپ سەنەمىن.
سوندىقتان قانداي جاعدايدا دا ۇلى سپورتشىلارىمىزدىڭ جەتىستىكتەرى مەن جەڭىستەرىن ءبىز ەشقاشان ۇمىتپاۋىمىز كەرەك. قيىن ساتتەردە قولداۋ كورسەتۋ ارقىلى عانا ءبىز ولارعا سەنىم ۇيالاتىپ، كەلەر كۇندەردىڭ جەڭىستەرىنەن ءۇمىت ەتە الامىز.
ءبىز ءۇشىن ءبىزدىڭ سپورتشىلاردىڭ بارلىعى دا ناعىز چەمپيوندار!
ايدا بالاەۆانىڭ facebook پاراقشاسىنان
