Siz de attandyńyz aramyzdan, Ábsattar aǵa! Eldiń tuǵyrly tulǵasyna aınalyp edińiz. Ultymyz ben jurtymyzdyń ózińizge degen qurmeti bólek edi. «Júzinde tur jylylyq, Kórgen emes qubylyp, Ustanymy – ulaǵat, Uıǵarymy – ulylyq» dep azamattyǵyńyzdy ardaq tutar edi.
«Qaı elge de jersiner, Qanaǵatyn enshiler. Tileýlesi – tilshiler, Tálabasy – elshiler» dep ustazdyǵyńyzdy ulyqtar edi. «Qolynda mol deregi, Bolsa jurtqa keregi: Farabıdiń bir emes, Júzin taýyp beredi» dep ǵalymdyǵyńyzdan ǵıbrat alar edi. «Jigerińdi janıdy, Barǵan jeri damıdy. Batysymdy baǵalap, Shyǵysymdy tanıdy» dep qaıratkerligińizdi qadirleıtin edi. Eren eńbegińizdi eleıtinderdiń esebi joq-ty. Ǵalamat izdenisińiz arqyly 30 Farabı, 10 Kerderi, 33 Saıramı, 17 Túrkistanı, 51 Tarazı rýhanı qazynamyzǵa qosylyp edi.
Abzal azamat. Ulaǵatty ustaz. Ǵıbratty ǵalym. Qarymdy qaıratker. Qysqasy, Qazaq eline Dinbasy bolǵan ardaqty aǵamyzdyń tórt qubylasy túgel edi. Edi... edi..
Baqul bolyńyz, álemi bólek Ábekem! Aldyńyzdan jarylqasyn, aǵa!
(Sýretti túsirgen Aıtjan Murzanov, Almaty, 2007 j.).
Baýyrjan OMARULY
