Taldyqorǵanda sońǵy birneshe jyldaǵy eń iri nysandardyń biri – olımpıadalyq tıptegi jabyq júzý basseıniniń qurylysy aıaqtaldy.
Osyndaı aýqymdy nysannyń saltanatty ashylýy Astana kúninde ótti.
Is-sharaǵa bokstan Olımpıada chempıony Ermahan Ibraımov, Almaty oblysynyń ákimi Amandyq Batalov, júzýden Qazaqstan Respýblıkasynyń birneshe dúrkin chempıony Marııa Fedotova, kásibı kúresker Ardaq Nazarov, aýyr atlet Ilıa Ilın qatysty.
Jetisý ólkesiniń sport qaýymdastyǵy basseınniń ashylýyn asyǵa kútti. Joba memlekettik-jeke menshik seriktestik aıasynda júzege asyryldy, al onyń iske asyrylý barysyn oblys basshysy jeke ózi qadaǵalady. Irgetasyn qalaýdan bastap, irgeles aýmaqty abattandyrýǵa deıingi jumystardyń barlyǵy aımaq basshysynyń nazarynan tys qalǵan joq.
"Búgingi ashylyp otyrǵan zamanaýı júzý basseıni – kózdiń jaýyn alady. Atalǵan ǵımarat qalanyń tórinde 3,8 ga jerge qanatyn jaıdy. Bul ǵımarattyń jalpy aýdany – 13 myń sharshy metrden asady. Júzý basseıniniń qurylysyna 11,4 mlrd. teńgeden astam qarajat jumsaldy.Mundaı ásem de, ádemi, záýlim sporttyq nysannyń boı kóterýi – el ekonomıkasy damýynyń aıqyn kórinisi",– dedi oblys ákimi Amandyq Batalova.
Aıta keteıik, Jetisýdaǵy búkil respýblıka boıynsha teńdesi joq jańa nysan qalanyń ońtústik-batys turǵyn alabynda ornalasqan. Jabyq basseınniń jalpy aýdany - 27 myń sharshy metrdi quraıdy. Onda álemdik standarttarǵa sáıkes keletin 3 basseın bar. Olardyń biri, uzyndyǵy 50 metr, júzý, akvaaerobıka, sý doby jáne sınhrondy júzý boıynsha oqý-jattyǵý sabaqtaryna arnalǵan. Al ekinshisi-bıiktigi 5-ten 10 metrge deıin sýǵa sekirý úshin. Onda respýblıkalyq jáne halyqaralyq deńgeıdegi jarystar ótedi, olardy amfıteatr túrindegi minbelerden 500-den astam adam baqylaı alady.
Sarapshylardyń aıtýynsha, ǵımarattyń sáýleti kórermender júzýshiniń ár qımylyn qadaǵalaı alatyndaı etip josparlanǵan.
Jarystan bos ýaqytta Taldyqorǵan turǵyndary men qonaqtarynyń ıgiligi úshin ámbebap basseın jumys isteıtin bolady. Munda júzýdiń barlyq túrleri úshin jaǵdaı jasalǵan. Balalar men áleýmettik az qamtylǵan turǵyndar úshin jekelegen jaǵdaılar jasalǵan.
Aldaǵy tańda oblystyq dene shynyqtyrý jáne sport basqarmasynyń habarlaýynsha, vaterpolo men sınhrondy júzýden qalalyq jáne oblystyq komandalar qurylady. Osylaısha, sporttyń sý túrleri boıynsha bolashaq chempıondardy tárbıeleý jolynda birshama jumystar atqarylady. Kúnine basseın 750 adamǵa deıin qabyldaı alady.
"Jalpy, bizdiń oblysta sportty damytýǵa jáne salaýatty ómir saltyn qalyptastyrýǵa, ásirese jas urpaq arasynda erekshe kóńil bólinetinin atap ótkim keledi. Máselen, ótken jyldyń ózinde Jetisýda onǵa jýyq sport nysany paıdalanýǵa berildi. Jetisýlyqtar úshin asa mańyzdy nysannyń búgingi ashylýy - tarıhı sát, Taldyqorǵannyń sý sportynyń astanasy bolý jolyndaǵy Alǵashqy qadamdarymyz. Jerlesterimiz áli de sý sporty túrleriniń shyńdaryn baǵyndyratynyna senemin", – dedi oblystyq dene shynyqtyrý jáne sport basqarmasynyń basshysy Nurbaqyt Teńizbaev.
Basseınniń ashylýyn qala turǵyndary da asyǵa kútti. Qurylys alańynan ótip bara jatyp, onyń aýqymdylyǵyna nazar aýdarmaý múmkin emes. Bul shynymen de kópten kútken jáne qýanyshty sát. Sondyqtan da, taldyqorǵandyqtar biregeı nysannyń ashylýyna otbasymen kelgen.
- Eń aldymen nemerelerimdi júzýge jazamyn. Zamanaýı basseın jas sportshylarǵa erekshe múmkindik beredi. Balalar joǵary deńgeıde jattyǵady. Sport ǵımaratynyń ózi Taldyqorǵannyń taǵy bir boıtumary bolady dep oılaımyn",- deıdi qala turǵyny Aıman Tuńǵyshbaıqyzy.
