Täuelsızdıktıŋ 30 jyldyǧy - būl halqymyzdyŋ maŋdai terımen jetken jetıstıkterınıŋ rämızı, sonymen bırge – jaŋa tarihi syn. Osy uaqyt ışınde halyqtyŋ erkın sanasy qalyptasyp, egemen eldıŋ jaŋa da jasampaz ūrpaǧy östı. Qazaqstan älemde märtebelı memleket retınde ornyqty. Ärine, būl uaqyt ışınde maqtanuǧa tūratyn, memlekettıgımızdı nyǧaityp, bükıl älemge paş etuge laiyqty talai auqymdy ıster jasaldy.
Degenmen, Täuelsızdık osy otyz jylmen şektelmeidı. Oǧan jetudıŋ tarihy, qazaǧymyzdyŋ körgen qasıretı bır jaǧynda tūrsa, ekınşı jaǧynda eldıgımızdı, egemendıgımızdı saqtap, ony keleşek ūrpaq üşın nyǧaitu ısınıŋ tūrǧany sözsız. Memleket basşysy Qasym-Jomart Toqaev özınıŋ «Täuelsızdık bärınen qymbat» atty maqalasynda Täuelsızdıktıŋ qadırı men qūndylyǧyn, ony saqtaudaǧy baǧdar – belesterdı aiqyndap berdı. Prezident memleketımızdıŋ otyz jylda ötkergen belesterdı tızgındep, olardyŋ ärqaisysy atqarǧan missiiasy tūrǧysynan ǧasyrdyŋ jügın arqalap tūrǧanyna nazar audardy. «Köregen basşy eldı ösıredı» demekşı, Qazaqstannyŋ memleket bolyp, keregesınıŋ keŋeiuı jolyndaǧy Elbasynyŋ dara köşbasşylyǧynyŋ maŋyzyna aiyryqşa toqtaldy. Sonymen qatar Memleket basşysy soŋǧy uaqytta aumaqtyq tūtastyǧymyzǧa kümän keltırıp, tatu körşılık qatynastarǧa syna qaqqysy keletın keibır şetel azamattarynyŋ arandatuşylyq ıs-äreketterıne de jauap bere otyryp, bızdıŋ ekıjaqty kelısımdermen bekıtılıp, halyqaralyq deŋgeide tanylǧan şekaramyzdyŋ bar ekenın basa aitty. Tıptı 2018 jyly Kaspii teŋızınıŋ qūqyqtyq märtebesı turaly konvensiiaǧa qol qoiylǧannan keiın qūrlyqtaǧy ǧana emes, teŋızdegı şekaramyz da bırjola aiqyndalyp, tüpkılıktı şeşılgenı de belgılı. Sondai-aq, azamattarmyzdy köpten mazalap jürgen jer mäselesı boiynşa da naqty jauap retınde qazaqtyŋ jerı eşbır şeteldıktıŋ menşıgıne berılmeitını, eşqaşan satylmaityny Prezidenttıŋ maqalasynda taǧy da rastaldy.
“Bırlıktı el būzylmas”, sondyqtan memleketımızdı bırtūtas dep bıluımız jäne tanytuymyz qajet. Ol üşın aimaqtarymyzdy soltüstık, oŋtüstık, batys, şyǧys dep böle bermei, tarihi, mädeni maŋyzdy ataulardy engızu de maŋyzdy. Ärine, ony Memleket basşysy aitqandai, baiyppen, oilanyp jüzege asyru kerek. Är qazaq üşın atalarymyzdyŋ qany men terı tamǧan bır uys topyraqtyŋ özı esebı joq bailyq. Alaida būl jerdı dūrys paidalanu, qadırın bılıp qasterleu, şynaiy otansüigıştıktı qalyptastyru - kezek küttırmeitın ülken jūmys. Aldaǧy törtınşı onjyldyqtyŋ bızge jükteitın mındetı quatty eldıŋ iesı jäne kemel halyq bolu. Būl jolda saiasi – ekonomikalyq reformalardy jäne sanany jaŋǧyrtu üderısın jalǧastyryp, zaman talabyna beiımdelgen ūlttyŋ jaŋa bolmysyn qalyptastyruymyz qajet. Ūlttyŋ jaŋa bolmysy ötkendı bıluden, därıpteuden bastalady. Täuelsızdık qūndylyǧy halqymyzdyŋ jadynda mäŋgı saqtaluy üşın öskeleŋ ūrpaq onyŋ qadırın bıluı kerek. Būl rette, tarihi jadynyŋ orny erekşe.
Täuelsızdıgımızdıŋ 30 jyldyǧymen qatar, būl egemendıkke jetkızgen qaiǧy – qasıretke toly tarihi oqiǧalardy ūmytpaǧan jön. Milliondaǧan adamdy qazaǧa ūşyratyp, tırı qalǧanyn jan sauǧalap, bosyp ketuge mäjbür etken alapat aşarşylyqtyŋ alǧaşqy kezeŋı 1921-1922 jyldardaǧy näubetten berı 100 jyl öttı. 1986 jyly ūlqyzdarymyzdy Keŋes Odaǧynyŋ qaharynan qaimyqpai, ūlt namysy üşın alaŋǧa şyǧarǧan Jeltoqsan oqiǧasyna da 35 jyl tolady. Būnyŋ bärı bızdıŋ tarih. Memlekettılıgımız turaly tıs jaryp otyrǧandardyŋ auzyna qūm qūiu üşın myŋdaǧan ǧasyrlarǧa sozylǧan tarihymyzdyŋ, älemnıŋ jartysyna ie bolǧan alyp memlekettık qūrylystyŋ, azattyq üşın soǧystardyŋ, batyrlar jyrlaryn, Alaş qozǧalysynyŋ baǧdarlamalaryn, jalpy ūlt şejıresın jappai qaita qarap, ony öz elımızben qatar bükıl älemge jaŋa aqparattyq tetıkter arqyly paş etu - maŋyzdy mındet. Qazaqstannyŋ asqaq bolaşaǧy üşın eldık saiasat, jasampaz patriotizm, memlekettıŋ igılıgı üşın kündelıktı eŋbek pen ūlt bırlıgı öte maŋyzdy.
S.Mūzdybaeva
Ūqsas jaŋalyqtar
