(Alaqandaı esse)
Qazir úıden uzamaı-aq álemniń áıgili kitaphanalaryn lezdiń arasynda sharlap shyǵasyń. Internettiń ıirimine tereńirek bir súńgi de, qajetińdi ala ber. Boldy... Al bir kezde bári basqasha edi. Kún uzaqqa sarylyp kitaphanada otyrasyń. Kitap aqtarasyń. Qoljazba qaraısyń. Kóne qundylyqtarǵa tereń boılaısyń. Onyń rahatyna eshnárse jetpeıdi. Búgingi ǵalamtoryń da, basqań da...
Eski júıe ydyraı bastaǵan kezde ǵylymǵa kelgen meniń tustastarym Ulttyq Ǵylym akademııasy kitaphanasynyń sırek kitaptar men qoljazbalar bóliminde túneýge bar edi. Sebebi, eski jádigerliktiń bári osynda. Kirseń, shyqqyń kelmeıdi. Birinen biri baǵaly qoljazbalar. Máni tereń mátinder...
Ortalyq ǵylymı kitaphananyń altyn dáýiri edi bul. Qut qonǵan bilim ordasyn zııalylardyń zııalysy Kúljıhan Ábýǵalıeva ápkemiz basqaratyn. Ol kisiniń tusyndaǵy kitaphanashylardyń bolmysy bólek-ti. Shetinen sypaıy, mádenıetti, yqylasty... Beıne bir tektiliktiń teorııasyn taýysyp, kisiliktiń kýrsynan ótip kelgendeı, kez-kelgen oqyrmanǵa jyly júz, jaıdary qabaq tanytyp, jarqyldap júrer edi. Sol dástúr bertinge deıin keldi-aý deımin. Ýaqyt almasty. Bizdiń dáýirimizdiń kitaphanashy qyzdary jańa urpaqqa jol berdi. Sol qaıtpas qaısar urpaq daǵdyly dástúrdi jalǵastyra alyp júr me, ony bilmeımin. Eger solaı bolsa, tek qana qýanyshtymyz...
Osy kitaphananyń sırek kitaptar men qoljazbalar bólimine Raısa Birimjarova uzaq jyl jetekshilik etti. Ózi de, sózi de, minezi de kórkem sol ápkemizdiń sharapatyn talaı kórdik. Ol árqaısymyzdy baýyryndaı kóretin. Qaı qoljazbanyń qaı qýysta jatqanyn jaqsy biledi. Tipti sıpattamasyna deıin jatqa aıtady. Qıylyp suraǵan dúnıeńdi qınalmaı taýyp beredi. Sol jaıly minezimen oqyrmandarynyń sheksiz iltıpatyna bólendi. Ǵylymı jumysyńa tileýlestik tanytady, qoldan kelgen kómegin aıamaıdy. Quddy bir ǵylymı kitaphanada emes, ardaqty apaıyńnyń úıinde meıman bop júrgendeı ádemi kúı keshesiń. Rýhanı baılyqtyń bári qolynda turǵan soń ol kisini syrttaı «Qazynaly hanshaıym» dep ataıtynbyz...
Eń jaqsy kitaphanashylardyń bári Raısa apaı basqaratyn sırek kitaptar men qoljazbalar bóliminde qyzmet isteıtindeı kórinetin bizge. Osy bólimde jıǵan-tergenimiz arqyly jetildik. Óz salamyzda azdy-kópti tabysqa jetsek, eski men estiniń basyn qosqan sol berekeli bólimniń arqasy.
Qadirli meniń dáýirimniń aspıranttary men izdenýshileri, qazir kitaphana júıesinen edáýir aýlaqta júrgen Raısa apaıymyzdy umytyp ketken joqsyzdar ma? Búgin bárimizdiń ádemi ápkemiz áıba-a-a-at jasqa keldi! Mereıli ári mártebeli jas! Sáýletti ári salıqaly jas! Jaı, tek sony eske salaıyn dep...
* * *
Ǵumyryńyz uzaq, tórt qubylańyz túgel bolsyn, qazynaly hanshaıym!
Baýyrjan OMARULY
