قازىنالى حانشايىم

2072
Adyrna.kz Telegram

(الاقانداي ەسسە)

قازىر ۇيدەن ۇزاماي-اق الەمنىڭ ايگىلى كىتاپحانالارىن لەزدىڭ اراسىندا شارلاپ شىعاسىڭ. ينتەرنەتتىڭ يىرىمىنە تەرەڭىرەك ءبىر سۇڭگى دە، قاجەتىڭدى الا بەر. بولدى... ال ءبىر كەزدە ءبارى باسقاشا ەدى. كۇن ۇزاققا سارىلىپ كىتاپحانادا وتىراسىڭ. كىتاپ اقتاراسىڭ. قولجازبا قارايسىڭ. كونە قۇندىلىقتارعا تەرەڭ بويلايسىڭ. ونىڭ راحاتىنا ەشنارسە جەتپەيدى. بۇگىنگى عالامتورىڭ دا، باسقاڭ دا...

ەسكى جۇيە ىدىراي باستاعان كەزدە عىلىمعا كەلگەن مەنىڭ تۇستاستارىم ۇلتتىق عىلىم اكادەمياسى كىتاپحاناسىنىڭ سيرەك كىتاپتار مەن قولجازبالار بولىمىندە تۇنەۋگە بار ەدى. سەبەبى، ەسكى جادىگەرلىكتىڭ ءبارى وسىندا. كىرسەڭ، شىققىڭ كەلمەيدى. بىرىنەن ءبىرى باعالى قولجازبالار. ءمانى تەرەڭ ماتىندەر...

ورتالىق عىلىمي كىتاپحانانىڭ التىن ءداۋىرى ەدى بۇل. قۇت قونعان ءبىلىم ورداسىن زيالىلاردىڭ زيالىسى كۇلجيحان ابۋعاليەۆا اپكەمىز باسقاراتىن. ول كىسىنىڭ تۇسىنداعى كىتاپحاناشىلاردىڭ بولمىسى بولەك-ءتى. شەتىنەن سىپايى، مادەنيەتتى، ىقىلاستى... بەينە ءبىر تەكتىلىكتىڭ تەورياسىن تاۋىسىپ، كىسىلىكتىڭ كۋرسىنان ءوتىپ كەلگەندەي، كەز-كەلگەن وقىرمانعا جىلى ءجۇز، جايدارى قاباق تانىتىپ، جارقىلداپ جۇرەر ەدى. سول ءداستۇر بەرتىنگە دەيىن كەلدى-اۋ دەيمىن. ۋاقىت الماستى. ءبىزدىڭ ءداۋىرىمىزدىڭ كىتاپحاناشى قىزدارى جاڭا ۇرپاققا جول بەردى. سول قايتپاس قايسار ۇرپاق داعدىلى ءداستۇردى جالعاستىرا الىپ ءجۇر مە، ونى بىلمەيمىن. ەگەر سولاي بولسا، تەك قانا قۋانىشتىمىز...

وسى كىتاپحانانىڭ سيرەك كىتاپتار مەن قولجازبالار بولىمىنە رايسا ءبىرىمجاروۆا ۇزاق جىل جەتەكشىلىك ەتتى. ءوزى دە، ءسوزى دە، مىنەزى دە كوركەم سول اپكەمىزدىڭ شاراپاتىن تالاي كوردىك. ول ارقايسىمىزدى باۋىرىنداي كورەتىن. قاي قولجازبانىڭ قاي قۋىستا جاتقانىن جاقسى بىلەدى. ءتىپتى سيپاتتاماسىنا دەيىن جاتقا ايتادى. قيىلىپ سۇراعان دۇنيەڭدى قينالماي تاۋىپ بەرەدى. سول جايلى مىنەزىمەن وقىرماندارىنىڭ شەكسىز ءىلتيپاتىنا بولەندى. عىلىمي جۇمىسىڭا تىلەۋلەستىك تانىتادى، قولدان كەلگەن كومەگىن ايامايدى. قۇددى ءبىر عىلىمي كىتاپحانادا ەمەس، ارداقتى اپايىڭنىڭ ۇيىندە مەيمان بوپ جۇرگەندەي ادەمى كۇي كەشەسىڭ. رۋحاني بايلىقتىڭ ءبارى قولىندا تۇرعان سوڭ ول كىسىنى سىرتتاي «قازىنالى حانشايىم» دەپ اتايتىنبىز...

ەڭ جاقسى كىتاپحاناشىلاردىڭ ءبارى رايسا اپاي باسقاراتىن سيرەك كىتاپتار مەن قولجازبالار بولىمىندە قىزمەت ىستەيتىندەي كورىنەتىن بىزگە. وسى بولىمدە جيعان-تەرگەنىمىز ارقىلى جەتىلدىك. ءوز سالامىزدا ازدى-كوپتى تابىسقا جەتسەك، ەسكى مەن ەستىنىڭ باسىن قوسقان سول بەرەكەلى ءبولىمنىڭ ارقاسى.

قادىرلى مەنىڭ ءداۋىرىمنىڭ اسپيرانتتارى مەن ىزدەنۋشىلەرى، قازىر كىتاپحانا جۇيەسىنەن ەداۋىر اۋلاقتا جۇرگەن رايسا اپايىمىزدى ۇمىتىپ كەتكەن جوقسىزدار ما؟ بۇگىن ءبارىمىزدىڭ ادەمى اپكەمىز ءايبا-ا-ا-ات جاسقا كەلدى! مەرەيلى ءارى مارتەبەلى جاس! ساۋلەتتى ءارى ساليقالى جاس! جاي، تەك سونى ەسكە سالايىن دەپ...

* * *

عۇمىرىڭىز ۇزاق، ءتورت قۇبىلاڭىز تۇگەل بولسىن، قازىنالى حانشايىم!

باۋىرجان ومارۇلى

پىكىرلەر