Májilis depýtaty, aıtysker aqyn Rınat Zaıytov elimizdegi sportshylar arasynda teris dinı aǵymǵa bet buryp júrgender bar ekenin aıtty, dep habarlaıdy "Adyrna" ulttyq portaly Adal Adam YouTube-arnasyna siltep.
«Is-sharalarǵa baramyz, túrli salanyń ókilderimen aralasamyz. Sondaı jıyndarda sportshylar da bolady. Solardyń arasynda «biz halıfat qurýymyz kerek» dep ashyq aıtatyndary bar», – deıdi depýtat.
Onyń aıtýynsha, ásirese kúsh qoldanylatyn sport túrlerinde júrgen keıbir sportshylardyń dinı kózqarasy alańdatarlyq.
«MMA jarystarynda bir jaǵyna Qazaqstannyń týyn, ekinshi jaǵyna jasyl tústi, arabsha jazýy bar týdy alyp shyǵatyn qazaqtyń jigitterin óz kózimmen kórdim. Ol qandaı tý – túsinbedim. Biraq olar nege osy sport túrin tańdaıdy, túpki maqsaty ne – bul jaǵy zerttelmeı jatyr», – dep alańdaýshylyǵyn bildirdi Zaıytov.
Depýtattyń sózinshe, búginde teris aǵym ókilderin syrtqy kelbeti arqyly taný da qıyn.
«Baıaǵydaı saqal qoıyp, syrttaı bilinetin ýaqyt emes. Qazir ondaılar saqal da ósirmeıdi. Mysaly, Sırııada bir kúnde búlik bolǵanda, qaýiptiń qaıdan kelgenin halyq túsinbeı qalǵan. Keıin belgili bolǵandaı, DAISh ókilderi sol eldiń bıligine deıin kirip alǵan eken. Sondyqtan ondaı qaýip bizde joq dep kesip aıtý qıyn. Tańdanatynym – bul másele nege áli kúnge deıin tereń zerttelmeı keledi?», – deıdi májilismen.
Aıta keteıik, buǵan deıin QR Sport jáne dene shynyqtyrý isteri agenttiginiń basshysy Erbol Myrzabosynov «dindar» sportshylarmen jumys júrgiziletinin, bul baǵytta arnaıy jol kartasy jasalǵanyn málimdegen edi.
