Jambyl oblysynyŋ būrynǧy äkımı Kärım Kökırekbaev 12 jylǧa sottaldy. Būl turaly bügın, 3 şıldede Almaty oblysy sotynyŋ baspasöz qyzmetı aitty, dep habarlaidy «Adyrna» tılşısı.
Eks-basşydan bölek, onyŋ orynbasary Ädılet Ahataev pen merdıger Andrei Poplavskii kınälı dep tanyldy.
Kökırekbaev pen Ahataevqa Qylmystyq kodekstıŋ 366-baby (asa ırı mölşerde para alu), al Poplavskiiǧa 195 jäne 367-baptary (asa ırı mölşerde para beru, sondai-aq ūrlau maqsatynsyz mülıktık zalal keltıru) boiynşa aiyp taǧyldy.
«Tergeu mälımetterı boiynşa Kökırekbaev pen Ahataev lauazymdy tūlǧalar bola otyryp, merdıger ūiymnyŋ direktory Poplavskiimen söz bailasyp, oryndalǧan jūmystar aktılerıne kedergısız qol qoiu üşın asa ırı kölemde para alǧan. Sondai-aq Poplavskii şyn mänınde oryndalmaǧan qūrylys-montaj jūmystarynyŋ aktılerıne qol qoiudy ūiymdastyrǧan»,—delıngen habarlamada.
Būl äreketterdıŋ saldarynan memleketke 2 milliard teŋgege juyq şyǧyn kelgen.
Sot ükımımen Kökırekbaev 12 jylǧa, Ahataev pen Poplavskii 11 jylǧa bas bostandyǧynan aiyryldy. Ükım zaŋdy küşıne engen joq.
Eske salaiyq, Kärım Kökırekbaev 2022 jyly ūstalǧan bolatyn. 2023 jylǧy 24 mamyrda Almaty oblysy boiynşa sybailas jemqorlyqqa qarsy qyzmet «Qazseldenqorǧaudyŋ» bır emes, bırneşe basşysyna qatysty sotqa deiıngı tergeudıŋ aiaqtalǧany turaly habarlaǧan. Sol kezde olardyŋ käsıpkerlerden oryndalǧan jūmystar aktılerıne qol qoiǧany jäne jalpy qamqorlyǧy üşın jalpy somasy 396 mln teŋgege ırı jäne asa ırı kölemde para alǧany aitylǧan.
Keiın Kärım Kökırekbaev sotta aqtalyp şyqqan. Alaida 2024 jylǧy 25 şıldede Almaty oblystyq soty «Qazseldenqorǧau» memlekettık mekemesınıŋ būrynǧy basşysyna qatysty aqtau ükımınıŋ küşın joiyp, qylmystyq ıs bırınşı satydaǧy sotqa qaita qarauǧa jıberılgen. Al Kökırekbaev sot zalynda qamauǧa alynǧan.
Aita keteiık, ol 2019 jyly «Qazseldenqorǧau» memlekettık mekemesınıŋ basşysy bolyp taǧaiyndalǧan. Būdan bölek, 2018-2019 jyldary Qazaqstan Respublikasynyŋ Qyrǧyz Respublikasyndaǧy Tötenşe jäne Ökılettı Elşısı, 2013-2018 jyldar aralyǧynda Jambyl oblysynyŋ äkımı lauazymdaryn atqarǧan.
