Araı Ońǵarqyzy 6 jasynan qolyna dombyra ustaǵan. Qarshadaı qyz úlken sahnaǵa aıaq basqaly eki jyl ǵana bolǵanymen, dástúrli oryndaýshylardyń respýblıkalyq jáne halyqaralyq baıqaýlarynda júlde alyp, halyqtyń yqylasyna bólenip úlgerdi dep jazady "Habar" arnasynyń resmı saıty.
Shynashaqtaı qyzdyń shejireden syr tartqan sazdy jyrdy tógilte oryndaýy onyń ózindik ereksheligi. Syr súleıleriniń sara jolyn jalǵaýshy jas talant tolǵaý-termelerdi ǵana emes, áıgili Kóruǵly dastanyn da kómeıinde quıqyljytyp júr. Araıdyń ustazy Záýre Káribaeva aýyldaǵy «Tasbergen jyraý» úıirmesine jetekshilik jasaıdy. Tyrnaqtaı qyzdyń talantyn baıqap, qanatyn qomdaǵan osy kisi.
Záýre Káribaeva, «Tasbergen jyraý» úıirmesiniń jetekshisi
-Respýblıkalyq «Shoq juldyz» baıqaýyna qatysyp, bas júlde aldyq. Odan keıin halyqaralyq «Boztorǵaı» baıqaýyna baryp, ekinshi oryn aldyq. Ústimizdegi jyldyń sáýir aıynda Qytaı Halyq Respýblıkasynyń Úrimshi qalasyndaǵy «Talant shoý» degen úlken baıqaýǵa osy Qyzylorda oblysynyń atynan kishkentaı termeshi retinde Araı baryp qatysty. Túrkııa qalasyna joldamamyz naýryz aıynda bolady dep kútilýde.
Jýyrda jas jyrshy Alataýdyń baýraıyndaǵy ásem qalada Elbasynyń aldynda óner kórsetip, aqyn-jyraý Aıdos Rahmetovtyń «Elin súıgen Elbasy» týyndysyn oryndady. Talaby taýdaı órenniń ónerine rıza bolǵan Memleket basshysy batasyn berip, dombyra syıǵa tartty.
Araı Ońǵarqyzy, jyrshy
-Bul dombyra men úshin úlken syılyq. Elbasynyń senimin aqtaımyn. Osy dombyramen ári qaraı jyrshylyǵymdy jalǵastyra beremin.
Yrysbıke Másenqyzy, Araı Ońǵarqyzynyń ájesi
-Qanshama halyqtyń aldyna taısalmaı, áıdik sahnada Araldyń jyraýy Nurtýǵannyń termesin jatqa aıtyp bergen, sonshama shýmaqtyń bárin. Sóıtip halyqtyń barlyǵy dúrsilkinip qýanyp, sodan beri Araı halyqtyń da aýzynan túspeı júr, sahnadan da túspeı júr.
Júz shaıyr shyqqan Turmaǵambet aýylynda týǵan bala jyrshynyń dara jyrshy bolaryna dástúrli ónerdiń maıtalmandary shek keltirmeıdi. Osyndaı tekti urpaq barda ulttyq óner de ómirsheń.
Nurlan Jaqypbekov,
khabar.kz
