Almaty qalasynyń qylmystyq ister jónindegi mamandandyrylǵan aýdanaralyq soty ótken jyldyń jeltoqsanynda úsh adamnyń ólimine sebep bolǵan avtobýs apaty isi boıynsha úkim shyǵardy, dep habarlaıdy «Adyrna» tilshisi.
32 jastaǵy aıyptalýshy Darhan Ahmetjanov Qylmystyq kodekstiń 351-babynyń 3-bóligi (kóliktiń qaýipsiz jumysyn qamtamasyz etetin, abaısyzda eki nemese odan da kóp adamnyń ólimine ákep soqqan erejelerdi buzý) boıynsha, 293-babynyń 1-bóligi (buzaqylyq) boıynsha kináli dep tanyldy.
Ahmetjanov 8 jyl bas bostandyǵynan aıyryldy. Sottalýshy óz kinásin ishinara moıyndady. Ol jazasyn qaýipsizdigi barynsha tómen túzetý mekemesinde óteıdi.
Eske salaıyq, qaıǵyly oqıǵa Almatyda 2023 jyldyń jeltoqsanynda bolǵan edi. Darhan Ahmetjanov jol aqysyn tóleýdi ótingen áıel júrgizýshige agressııamen jaýap bergen. Janjal kezinde er adam qoǵamdyq kólikti ruqsat etilmegen jerde toqtatýdy talap etip, júrgizýshiniń bas tartýynan keıin onyń betinen eki ret urǵan. Saldarynan áıel esin joǵaltyp, kólikti basqara almaǵan. Nátıjesinde avtobýs jol jıeginde turǵan adamdarmen soqtyǵysty.
Jol apaty saldarynan úsh adam oqıǵa ornynda qaıtys bolyp, bir adam zardap shekti.
