Memleket basshysy Qasym-Jomart Toqaev sheteldikterge aýyl sharýashylyǵy jerlerin satýǵa jáne jalǵa berýge zań júzinde birjola tyıym salýdy tapsyrdy, dep habarlaıdy "Adyrna" ulttyq portaly Sputnik Qazaqstan saıtyna silteme jasap.
Halqymyz úshin jer máselesi qashanda asa mańyzdy ekenin atap ótken memleket basshysy jer – memlekettigimizdiń berik negizi ári qasıetti sımvoly ekenin atap ótti.
«Qazaqtyń jeri sheteldikterge satylmaıdy dep birneshe ret aıttym. Bul máselege qatysty qaýesetterdi toqtatý qajet. Sondyqtan, men mynadaı naqty sheshimder qabyldadym. Birinshiden, sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyıym salýdy tapsyramyn. Bul sheteldikterdiń úlesi bar zańdy tulǵalarǵa da qatysty», – dedi Toqaev ulttyq qoǵamdyq senim keńesiniń besinshi otyrysynda.
Ol muny prezıdenttiń zań shyǵarý bastamasy arqyly jedel túrde júzege asyrý qajet ekenin aıtty. Prezıdent ákimshiligi dál osy máselege baılanysty tıisti zań jobasyn ázirleýi kerek.
Sonymen qatar, Toqaev bir aı ishinde Jer reformasy jónindegi komıssııany quryp, 25 naýryzda jumysqa kirisýdi tapsyrdy. Ol komıssııa quramyna agrarlyq sektordyń bedeldi ókilderi men jer máselesin jetik biletin sarapshylardy qosý kerek, dep sanaıtynyn jetkizdi.
Budan bólek, úkimetke bıyl tamyz aıynyń sońyna deıin jer reformasynyń negizgi máseleleri boıynsha ortaq mámile arqyly túbegeıli baılam jasaýdy júktedi.
Prezıdenttiń aıtýynsha, komıssııa jumysynyń árbir kezeńi men onda usynylǵan sharalar týraly halyqty únemi habardar etip otyrý qajet.
«Basty mindettiń biri – komıssııa jumysy men sheshim qabyldaýynyń meılinshe ashyqtyǵyn kórsetý. Biz jerge qatysty qoǵam tarapynan kóterilgen barlyq máseleni durys jáne tıimdi sheshe alamyz dep senemin. Bul sheshimder, eń aldymen, el ekonomıkasyn damytýǵa jáne azamattardyń jumys sapasyn arttyrýǵa arnalǵan. Eń bastysy, jer sheteldikterge satylmaıtyny týraly túbegeıli sheshim qabyldandy», – dedi Toqaev.
