Memleket basşysy aqyn, Qazaqstannyŋ eŋbek sıŋırgen qairatkerı İsrail Saparbaidyŋ otbasyna köŋıl aitu jedelhatyn joldady. Būl turaly Aqorda jariialady, dep habarlaidy “Adyrna”.
Prezident Qasym-Jomart Toqaev körnektı aqyn, sazger, Qazaqstannyŋ halyq jazuşysy, «Parasat» ordenınıŋ iegerı İsrail Saparbaidyŋ dünieden ötuıne bailanysty otbasy men jaqyn tuystaryna köŋıl aitty.
«İsrail Saparbai ǧibratty ǧūmyryn kielı söz önerıne arnaǧan, töl ädebietımızdıŋ kökjiegın keŋeituge zor üles qosqan daryndy qalamger edı. Ūlttyq poeziia men dramaturgiiada özındık qoltaŋbasyn qaldyryp, naǧyz şyǧarmaşyl tūlǧa retınde önımdı eŋbek ettı», – dep jazylǧan jedelhatta.
Būǧan qosa, prezident aqynnyŋ ūltjandy azamattyǧyn halyq joǧary baǧalaǧanyn atap öttı.
«Qalyŋ oqyrman ömırşeŋ tuyndylarymen qatar ūltjandy azamattyǧyn joǧary baǧalady. Soŋyna bai ädebi-mädeni mūra qaldyrǧan İsrail Saparbaidyŋ jarqyn beinesı men esımı ūmytylmaidy», – dep jazdy Toqaev.
18 şıldede qazaq aqyny, dramaturg, sazger İsrail Saparbai 85 jasqa qaraǧan şaǧynda ömırden öttı.
