Jyl saiyn ŪBT kezınde oquşylardyŋ türlı aila-şarǧyǧa baryp, qaitse osy synaqtan joǧary ball aluǧa jantalasatyny üirenşıktı jaitqa ainalǧany ras. Oquşynyŋ būl äreketın balalyqqa da balauǧa bolady, ärine. Alaida mamandyǧyna qatysty bılıktılık synaǧyna baratyn mūǧalımnıŋ de soraqy qadamǧa baruyn qalai tüsınbek kerek? Mūǧalımderge arnalǧan Ūlttyq bılıktılık testıleu nauqanynda bırqatar mūǧalımnıŋ tıptı zaŋsyz äreketke jol bergenın Ūlttyq testıleu ortalyǧynyŋ basşysy aşyq mälımdedı.
Özınıŋ äleumettık paraqşasynda «Mūndaĭ mūǧalım ne üĭretedı?» dep bastaǧan jazbasynda Didar Smaǧūlov bılıktılık synaǧyn tapsyru kezınde kei mūǧalımderdıŋ tyiym salynǧan zattardy paidalanatynyn jazyp, aldaǧy uaqytta būl synaqqa ūstazdardyŋ qataŋ tekserılıp kırgızuge ūsynys jasaǧanyn jetkızdı.
«Bız qadırlı pedagogterımızge asqan qūrmetpen qarap, olardyŋ jūmysyn baǧalaĭmyz. Mıne, sondyqtan da Qazaqstan Respublikasy Bılım jäne ǧylym ministrlıgınıŋ tapsyrmasy negızınde Ūlttyq bılıktılık testıleudıŋ qatysuşylarynda tyĭym salynǧan zattardyŋ (smartfondardyŋ, şpargalkalardyŋ jäne basqa da qūrylǧylardyŋ) bar-joǧy tekserılmeitın.
Ökınışke qaraĭ, keĭbır ärıptesterımız bızdıŋ körsetken qūrmetımızdı älsızdıkke teŋep, tyĭym salynǧan zattardy jappaĭ qoldana bastady.
Eger 2020 jyly Erejenı būzǧan 1202 mūǧalım anyqtalsa, 2021 jyldyŋ 19 künınde ǧana būl körsetkış 349-ǧa deĭın östı!
Sonymen qatar, mikroqūlaqqaptar men mikrofondardy qoldanudyŋ jappaĭ faktılerı anyqtaldy, negızınen olardyŋ taralymy şekteulı jäne paĭdalanuy üşın qylmystyq bap qarastyrylǧan!Osy faktılerdı eskerıp, bügın Qazaqstan Respublikasy Bılım jäne ǧylym ministrlıgınıŋ apparattyq jinalysynda Ūlttyq bılıktılık testıleudı tapsyru kezınde mūǧalımderdı tekserudı engızu qajettıgın aĭttym!» dep jazǧan testıleu ortalyǧynyŋ basşysy senım joǧalǧan jerde bärı joǧalatynyn da jasyrmaidy. Osy mäselege qatysty öz pıkırınde almatylyq ūstaz Äigerım Nyşanbai: «Mūǧalım mūndai qadamǧa tek öz bılımınıe senbegen jaǧdaida ǧana barady. Ärine, sauatsyz, bılımsız mūǧalım synaqtan ötudıŋ kez kelgen jolyn taŋdaityny anyq. Menıŋşe, rasymen de bılıktılık synaǧyna mūǧalımderdı qataŋ tekserıp kırgızu dūrys şeşım. Özım de talai ärıptesımdı bılemın, attestasiiadan qalai ötkenın. Bırı tyiym salynǧan zattardy paidalansa, endı bırı tanys-tamyryn jaǧalap jürıp ötedı. Sondai jolmen ötken mūǧalım oquşyǧa ne üiretedı?»- dep küiınedı. Äigerımnıŋ ärıptesı, şymkenttık mūǧalım Dılmahambet Äşenov: «Zaŋmen tyiym salynǧan zattardy qoldansa, zaŋ aldynda jauapqa tartu kerek dep sanaimyn. Basqalaryna sabaq bolar edı. Ärine, synaqqa mūǧalımderdı tekserıp kırgızuı köŋılımızge tiedı-aq. Alaida, älgındei qadamǧa baryp jürgenderdı tekseru arqyly äşkerelemese, basqa joly joq ta ǧoi. Synaqqa qatysatyn mūǧalımdı ǧana emes, sol attestasiiaǧa qatysy bar basqa da lauazym ielerın belgılı bır tekseruden ötkızse, tıptı dūrys bolar edı. Sebebı, mūǧalımderge arnalǧan attestasiia keibıreuler üşın jantalas bolsa, endı bıreuler üşın «maişelpekke» ainalǧany ötırık emes»,- deidı.
Özınıŋ bılıktılık deŋgeiın anyqtaityn synaqqa zaŋsyz äreketter jasap, qatysyp jürgen mūǧalımnen ne qaiyr kütuge bolady? Sanasyna berılmegen sauattylyqty tyiym salynǧan zattyŋ kömegımen toltyru mümkın be? Al eŋ soraqysy, mūǧalım osyndai zaŋsyz qadamǧa baryp jatsa, rasymen ondai mūǧalımnen qaibır oŋǧan şäkırt şyǧady? Ökınıştı...
Meruert HUSAİNOVA,
«Adyrna» ūlttyq portaly.
Foto aşyq derekközden alyndy.Ūqsas jaŋalyqtar
