Budan jarty ǵasyr buryn jıyrmanyń jalyna endi ǵana jarmasqan qyzylordalyq jas fototilshi ǵalamat sýret (1-foto) túsirdi. Sol kúni ol «Qazaqfılmge» aýyldas aǵasy, ataqty rejısser Sultan Qojyqovty izdep barypty. Záýlim ǵımarattyń bir múıisinde kózine túsken jarasymdy jupty dereý qolyndaǵy fotomyltyǵynyń qaraýylyna iliktiredi.
Biraq sol joly Syr boıynyń sıdań jigiti Bolat Omarálıev (2-foto) kınoǵa túsip jatqan Quman men Merýertti, ıaǵnı, áıgili Qyz Jibek pen Tólegendi tarıhtyń taspasyna tańbalaǵanyn bilmepti.
Bolat OmarálıevBúginde bul ónerdiń shyńyna shyqqan teńdessiz talant, kózdegeni múlt ketpeıtin fotomergen arada elý jyl ótkende sol sýretti taýyp alyp, jarııaǵa jar saldy. Birtýar Bolat aǵamyzdyń jalpaq jurtqa tanymal jaıdary jupty taspaǵa tartqany bir bul emes. Onyń qazynaly qorjynyn aqtara qalsań, Tastanbekovtiń tarıhy men Ótekeshovanyń órnekteri kóptep tabylady.
Óıtkeni Aqbozattyń ıesi Syr boıyna talaı ret keldi. 1971 jyly «Qyz Jibek» fılminiń Aqmeshittegi alǵashqy kórsetilimine qatysty (3-foto).
1992 jyly ózi rólinde oınaǵan jastardyń jalyndy jetekshisi Ǵanı Muratbaevty ulyqtaý toıyna bardy (4-foto).
2008 jyly óziniń jetpis jyldyǵyna oraı Qyzylordada ótken merekelik qoıylymdy tamashalady (5-foto).
Sol syrly saparlardyń arasynda úzeńgiles dosy Bolat aǵamyzben sýretke túsýdi de (6-foto) umytqan joq...
Eki myń on jetinshi jylǵy jeltoqsannyń on besinde ardaqty Merýert apaıymyz Aqordadan «Parasat» ordenin taǵyp, júzi jarqyrap, Almatyǵa attanyp edi (7-foto). Bárimiz de qýana quttyqtaǵanbyz. Biraq... eki kúnnen soń qadirli Quman aǵamyz juldyzdar álemin betke aldy...
Búgin Qyz Jibek pen Tólegendi aıalaǵan qalyń qazaqtyń «Ień qaıda, Aqbozat?», – dep kúrsingenine týra úsh jyl... Aqbozat, seni qaıteıin...
Baýyrjan OMARULY
