Qazirgi ýaqytta qazaqstandyq stýdentter Reseı úkimeti shekteý engizýine baılanysty osy eldegi oqýyna bara almaı otyr.
Máskeýde Qazaqstannyń Reseıdegi elshisi Ermek Kósherbaev pen Rossotrýdnıchestvo basshysy Evgenıı Prımakovtyń kezdesýi ótti.
Áńgimeniń basty taqyryby qazaqstandyq stýdentterdiń Reseıge kirý múmkindigi jáne olarǵa birlese qoldaý bildirý máselesi boldy, dep habarlady Qazaqstannyń Reseıdegi elshiliginiń baspasóz qyzmeti.
Sondaı-aq, kezdesý barysynda mádenıet jáne bilim berý salasynda birqatar bastama kóterildi, olar aldaǵy birlesken is-qımyldarǵa negiz bolady.
Áńgime barysynda Evgenıı Prımakov qonaqtarǵa vedomstvonyń qyzmeti jáne ǵylymı-tehnıka, mádenıet, ekonomıka salalaryndaǵy, sondaı-aq bilim berý salasyndaǵy halyqaralyq baılanystardy qoldaý jáne damytý boıynsha júktelgen mindetter týraly aıtyp berdi.
Qazaqstandyq stýdentter Reseıge qashan bara alady
Qazaqstandyq stýdentterdiń Reseıge kirý máselesi bir aı ishinde sheshilýi múmkin. Bul týraly 9 qyrkúıekte Reseıdiń syrtqy ister mınıstri Sergeı Lavrov málimdedi.
"Barlyq eldiń stýdentterine, sonyń ishinde Qazaqstanǵa (Reseıge kirýge) múmkindik beretin naqty sharttar jaqyn arada anyqtalady. Kórshimizdiń bizge alǵashqylardyń biri bolyp oqýǵa kelgenin qalaımyz. Negizgi oıymyz keletin stýdentterdi belgili bir deńgeıde toptastyrý arqyly apta saıyn jaıǵastyrýdy kózdeımiz. Bul másele bir aıdyń ishinde sheshiledi dep úmittenemin", – dedi Lavrov.
Sonymen qatar, mınıstr Reseı men Qazaqstan shekaralaryn ashý ýaqyty epıdemıologııalyq jaǵdaıǵa baılanysty ekenin atap ótti.
Eske sala keteıik, 17 tamyzdan bastap Qazaqstan Reseımen áýeqatynasyn qalpyna keltirdi, biraq reseılik tarap áli shekarasyn ashqan joq.
