قازىرگى ۋاقىتتا قازاقستاندىق ستۋدەنتتەر رەسەي ۇكىمەتى شەكتەۋ ەنگىزۋىنە بايلانىستى وسى ەلدەگى وقۋىنا بارا الماي وتىر.
ماسكەۋدە قازاقستاننىڭ رەسەيدەگى ەلشىسى ەرمەك كوشەرباەۆ پەن روسسوترۋدنيچەستۆو باسشىسى ەۆگەني پريماكوۆتىڭ كەزدەسۋى ءوتتى.
اڭگىمەنىڭ باستى تاقىرىبى قازاقستاندىق ستۋدەنتتەردىڭ رەسەيگە كىرۋ مۇمكىندىگى جانە ولارعا بىرلەسە قولداۋ ءبىلدىرۋ ماسەلەسى بولدى، دەپ حابارلادى قازاقستاننىڭ رەسەيدەگى ەلشىلىگىنىڭ ءباسپاسوز قىزمەتى.
سونداي-اق، كەزدەسۋ بارىسىندا مادەنيەت جانە ءبىلىم بەرۋ سالاسىندا بىرقاتار باستاما كوتەرىلدى، ولار الداعى بىرلەسكەن ءىس-قيمىلدارعا نەگىز بولادى.
اڭگىمە بارىسىندا ەۆگەني پريماكوۆ قوناقتارعا ۆەدومستۆونىڭ قىزمەتى جانە عىلىمي-تەحنيكا، مادەنيەت، ەكونوميكا سالالارىنداعى، سونداي-اق ءبىلىم بەرۋ سالاسىنداعى حالىقارالىق بايلانىستاردى قولداۋ جانە دامىتۋ بويىنشا جۇكتەلگەن مىندەتتەر تۋرالى ايتىپ بەردى.
قازاقستاندىق ستۋدەنتتەر رەسەيگە قاشان بارا الادى
قازاقستاندىق ستۋدەنتتەردىڭ رەسەيگە كىرۋ ماسەلەسى ءبىر اي ىشىندە شەشىلۋى مۇمكىن. بۇل تۋرالى 9 قىركۇيەكتە رەسەيدىڭ سىرتقى ىستەر ءمينيسترى سەرگەي لاۆروۆ مالىمدەدى.
"بارلىق ەلدىڭ ستۋدەنتتەرىنە، سونىڭ ىشىندە قازاقستانعا (رەسەيگە كىرۋگە) مۇمكىندىك بەرەتىن ناقتى شارتتار جاقىن ارادا انىقتالادى. كورشىمىزدىڭ بىزگە العاشقىلاردىڭ ءبىرى بولىپ وقۋعا كەلگەنىن قالايمىز. نەگىزگى ويىمىز كەلەتىن ستۋدەنتتەردى بەلگىلى ءبىر دەڭگەيدە توپتاستىرۋ ارقىلى اپتا سايىن جايعاستىرۋدى كوزدەيمىز. بۇل ماسەلە ءبىر ايدىڭ ىشىندە شەشىلەدى دەپ ۇمىتتەنەمىن", – دەدى لاۆروۆ.
سونىمەن قاتار، مينيستر رەسەي مەن قازاقستان شەكارالارىن اشۋ ۋاقىتى ەپيدەميولوگيالىق جاعدايعا بايلانىستى ەكەنىن اتاپ ءوتتى.
ەسكە سالا كەتەيىك، 17 تامىزدان باستاپ قازاقستان رەسەيمەن اۋەقاتىناسىن قالپىنا كەلتىردى، بىراق رەسەيلىك تاراپ ءالى شەكاراسىن اشقان جوق.
