Qyz balanyń qylaýsyz sezimi

607

Jıyrma jastan  jańa asqan jap jas aqyn, qaryndasym – Aqgúl Aıdarbekovanyń óleńderin oqyp otyryp, áli kirlemegen pák júreginiń lúpilin tyńdaǵandaı boldym. Onyń tap-taza tumadaı móldirep turǵan jyrlarynan artyq alqynys pen jalǵan julqynystyń da, jylaýyqtyqqa uqsas jylymyq leptiń de, orynsyz órshelenýdiń de belgileri múlde baıqalmaıdy eken. Qaı óleńinen bolsa da qyz balaǵa tán qylaýsyz sezimniń tabıǵı sıpattaryn anyq baıqaýǵa bolady. Bul aqyn qyz ishki jan tolqynystaryn qaǵaz betine óleńmen túsirip otyrǵanda, otty sezimderin laýlatyp, lapyldatyp ta jibermeıdi, ne bolmasa jasandy uıańdyqqa salynyp, tym bosańsyp ta ketpeıdi.

Mahabbat týraly óleńderinde de úzdigip úlbireý men essiz eljireýge eshqashan jol bermeıdi-aý deımin. Mysaly, óziniń qupııa túrde jaqsy kóretin adamyna:

​​​​Kónip júrgen shyǵarmyn bos yńǵaıǵa,

​​​​Birdeńe dep aıtýǵa jetpeı kúshim.

​​​​Bir jylatyp alsań ǵoı osyndaıda,

​​​​Erkelep ketpeý úshin... – dep, júrek túbinde jatqan jasyryn syryn astarly túrde jetkize salady.

Aqgúl qaryndasymnyń taǵy bir ereksheligi – óte syrshyldyǵy bolsa kerek. Óleńderin oqyǵan adam onymen syrlasyp otyrǵandaı áserde qalady. Mysaly, «Sheshim» degen óleńinde qupııa túrde jaqsy kóretin adamynyń ózine salqyndyǵyna muńaıyp otyryp, kenetten mynandaı sheshim qabyldaıdy:

​​​​Júdeý jandy taǵy kimder qınamaq,

​​​​Mańdaıymdy bálkim endi óppes muń.

​​​​Bolar-bolmas aqylymdy jınap ap,

​​​​(Qoıshy sony...)

​​​​Umytamyn dep sheshtim.

Aqgúldiń «Áke» degen óleńi kimdi bolsa da tebirentpeı qoımaıdy. Bul óleń osy taqyrypta jazylǵan kóptegen aqyndardyń týyndylarynan múldem erekshe dep batyl túrde aıta alamyn. Munda ákesiniń tirligine namystanǵan qyz balanyń oǵan qaratylyp aıtylǵan perzenttik ókpesi men nazy sonsha náziktikpen óleń tiline kóshirilipti.                                                               Bul jas aqyn ózine ǵana tán qoltańbasyn taýyp alǵanǵa uqsaıdy. Sóz basynda aıtqanymdaı, tunyp turǵan tumadaı móldirlik pen kólgirsýden aýlaq shynshyldyq sol qoltańbanyń negizgi kórsetkishindeı bolyp kórinedi eken. Sirá, bul erekshelik aqynnyń ishki jan dúnıesiniń arpalysynan týyndap jatsa kerek.

​​​​Júregimdi jalǵyzdyq úgitedi, jonady...

​​​​Sondaı sátte qalaısha aıtylady jol áni?!

​​​​Sondaı sátte aryma kim arasha túsedi,

​​​​Sondaı sátte janyma kim jubanysh bolady?!

Mine, ishki arpalys degen – osy!

Sóz sonyńda aıtarym – Aqgúl aqyn eken! Qudaı syılaǵan sol qasıetin joǵaltyp almasa eken, damyta tússe eken!

 

 

​​​​​​​​​​Ábýbákir Qaıran,

“Adyrna” ulttyq portaly

Pikirler
Redakııa tańdaýy