قىز بالانىڭ قىلاۋسىز سەزىمى

4553
Adyrna.kz Telegram

جيىرما جاستان  جاڭا اسقان جاپ جاس اقىن، قارىنداسىم – اقگۇل ايداربەكوۆانىڭ ولەڭدەرىن وقىپ وتىرىپ، ءالى كىرلەمەگەن پاك جۇرەگىنىڭ ءلۇپىلىن تىڭداعانداي بولدىم. ونىڭ تاپ-تازا تۇماداي مولدىرەپ تۇرعان جىرلارىنان ارتىق القىنىس پەن جالعان جۇلقىنىستىڭ دا، جىلاۋىقتىققا ۇقساس جىلىمىق لەپتىڭ دە، ورىنسىز ورشەلەنۋدىڭ دە بەلگىلەرى مۇلدە بايقالمايدى ەكەن. قاي ولەڭىنەن بولسا دا قىز بالاعا ءتان قىلاۋسىز سەزىمنىڭ تابيعي سيپاتتارىن انىق بايقاۋعا بولادى. بۇل اقىن قىز ىشكى جان تولقىنىستارىن قاعاز بەتىنە ولەڭمەن ءتۇسىرىپ وتىرعاندا، وتتى سەزىمدەرىن لاۋلاتىپ، لاپىلداتىپ تا جىبەرمەيدى، نە بولماسا جاساندى ۇياڭدىققا سالىنىپ, تىم بوساڭسىپ تا كەتپەيدى.

ماحاببات تۋرالى ولەڭدەرىندە دە ۇزدىگىپ ۇلبىرەۋ مەن ەسسىز ەلجىرەۋگە ەشقاشان جول بەرمەيدى-اۋ دەيمىن. مىسالى، ءوزىنىڭ قۇپيا تۇردە جاقسى كورەتىن ادامىنا:

​​​​كونىپ جۇرگەن شىعارمىن بوس ىڭعايعا،

​​​​بىردەڭە دەپ ايتۋعا جەتپەي كۇشىم.

​​​​ءبىر جىلاتىپ الساڭ عوي وسىندايدا،

​​​​ەركەلەپ كەتپەۋ ءۇشىن... – دەپ، جۇرەك تۇبىندە جاتقان جاسىرىن سىرىن استارلى تۇردە جەتكىزە سالادى.

اقگۇل قارىنداسىمنىڭ تاعى ءبىر ەرەكشەلىگى – وتە سىرشىلدىعى بولسا كەرەك. ولەڭدەرىن وقىعان ادام ونىمەن سىرلاسىپ وتىرعانداي اسەردە قالادى. مىسالى، «شەشىم» دەگەن ولەڭىندە قۇپيا تۇردە جاقسى كورەتىن ادامىنىڭ وزىنە سالقىندىعىنا مۇڭايىپ وتىرىپ, كەنەتتەن مىنانداي شەشىم قابىلدايدى:

​​​​جۇدەۋ جاندى تاعى كىمدەر قيناماق،

​​​​ماڭدايىمدى بالكىم ەندى وپپەس مۇڭ.

​​​​بولار-بولماس اقىلىمدى جيناپ اپ,

​​​​(قويشى سونى...)

​​​​ۇمىتامىن دەپ شەشتىم.

اقگۇلدىڭ «اكە» دەگەن ولەڭى كىمدى بولسا دا تەبىرەنتپەي قويمايدى. بۇل ولەڭ وسى تاقىرىپتا جازىلعان كوپتەگەن اقىنداردىڭ تۋىندىلارىنان مۇلدەم ەرەكشە دەپ باتىل تۇردە ايتا الامىن. مۇندا اكەسىنىڭ تىرلىگىنە نامىستانعان قىز بالانىڭ وعان قاراتىلىپ ايتىلعان پەرزەنتتىك وكپەسى مەن نازى سونشا نازىكتىكپەن ولەڭ تىلىنە كوشىرىلىپتى.                                                               بۇل جاس اقىن وزىنە عانا ءتان قولتاڭباسىن تاۋىپ العانعا ۇقسايدى. ءسوز باسىندا ايتقانىمداي، تۇنىپ تۇرعان تۇماداي مولدىرلىك پەن كولگىرسۋدەن اۋلاق شىنشىلدىق سول قولتاڭبانىڭ نەگىزگى كورسەتكىشىندەي بولىپ كورىنەدى ەكەن. ءسىرا، بۇل ەرەكشەلىك اقىننىڭ ىشكى جان دۇنيەسىنىڭ ارپالىسىنان تۋىنداپ جاتسا كەرەك.

​​​​جۇرەگىمدى جالعىزدىق ۇگىتەدى، جونادى...

​​​​سونداي ساتتە قالايشا ايتىلادى جول ءانى؟!

​​​​سونداي ساتتە ارىما كىم اراشا تۇسەدى،

​​​​سونداي ساتتە جانىما كىم جۇبانىش بولادى؟!

مىنە، ىشكى ارپالىس دەگەن – وسى!

ءسوز سونىڭدا ايتارىم – اقگۇل اقىن ەكەن! قۇداي سىيلاعان سول قاسيەتىن جوعالتىپ الماسا ەكەن، دامىتا تۇسسە ەكەن!

 

 

​​​​​​​​​​ابۋباكىر قايران،

“ادىرنا” ۇلتتىق پورتالى

پىكىرلەر