Erte-erte-ertede bir han ómir súripti. Hannyń, sulýlyǵyn jan tatpaǵan qyzy bolǵan eken. Bir kúni hannyń qyzy qatty aýyryp qalady. Qyzdyń aýrýyna eshqandaı emshi dárý tappaıdy. Sóıtip bir kúni elde eń jaqsy degen emshini shaqyrady. Emshi qyzdy qarap, «Sizdiń qyzyńyzǵa baqytty adamnyń kóılegin kıgizý kerek» – dep aıtady.Sonda han óz sarbazdaryn baqytty adamnyń kóılegin taýyp ákelýdi buıyrady. Izdep-izdep, sarbazdar bir baıdyń úıine keledi. Baıdan «Baqyttysyń ba?» dep surasa, baı «Baqyttymyn» dep jaýap beredi. Sonda olar baıdyń kóılegin surap, hannyń qyzyna apara jatqanyn baıandaıdy. Sonda baı: «Mende baılyq ta bar, bári bar, biraq balam joq. Sondyqtan meniń kóılegim qyzǵa kómek bola almas» dep jolaýshylardy shyǵaryp salady.
Sóıtip, sarbazdar balasy kóp bir otbasyna keledi. Otaǵasynan «Baqyttysyń ba?» degen suraqqa, «Balalarym kóp bolǵanmen, keıde olardy asyraýǵa shamam jetpeı jatady. Eger biraz qarjym bolsa, bálkim tolyqqandy baqytty bolar ma edim» deıdi.
Sarbazdar taǵy da izdeýge kóshedi. Izdenisteri uzaqqa sozylady. Endi qoldy bir siltep, saraıǵa qaıtamyz ba dep júrgende, kishkentaı bir shalashtan jaryq kóredi. Jaqyndaı kele ishten: «Men netken baqytty edim, búgin nan taýyp jedim!» degen rızaly daýysty estıdi. Ishke kirip, kóılegin suraıyn dese kedeıdiń kóılegi joq eken.
