Nesıbesın ūlttyq önerden tapqan jan

Almaty oblysynyŋ Eskeldı audanyna qarasty Baqtybai auylynyŋ tūrǧyny Meiırhan Danyşpanov bala künınen özge qatarlastarymen bırge küres önerıne yqylas qoiyp, boz kılemde bıraz ter tökken. Äitse de uaqyt öte kele densaulyǧy syr berıp, jürıp-tūruy qiyndap, bırte-bırte qos baldaqqa künı qarap qaldy. Mūndai jaǧdaida sportpen şyndap ainalysu qaida? Kezınde dūrys qoiylmaǧan diagnozdyŋ saldarynan boz kılemge şyǧyp beldesu bırte-bırte oryndalmas armanǧa ainalyp kete bardy. Aldyna qoiǧan maqsatyna jetu jolynda küreserge qairan bolmaǧan soŋ, bıraz uaqyt abdyrap, ne ısterın bılmei, aidyŋ-künnıŋ amanynda tura joldan adasqandai küi keşkenı ras.

Elımız täuelsızdıgın alyp, jo­ǧymyzdy ızdep, barymyzdy tü­gen­dei bastaǧan şaqta Mäkeŋ de ejelgı qolöner būiymdaryna den qoidy. Er şapqysy keldı. Bıraq būryn-soŋdy onyŋ jasalyp jatqanyn közımen körmegen soŋ ūqsata almai, bıraz äbıgerge tüs­kenı bar. Sol kezderı aǧasy Mäjit «Qazaqtyŋ er-toqymyn satamyn» degen habarlandyrudy körıp, telefonyn jazyp alyp «Bauyrym er-toqym jasaǧysy keledı. Sızge alyp kelıp jolyqtyrsam qarsy emessız be?» dep sūraidy. Söitıp, auyldaǧy Meiırhanǧa habar berıp, Seiıtker Medeubaev degen şe­berge alyp keledı.
- Seiıtker şeber sol kezderı 60-ty alqymdap qalǧan qazaqtyŋ aq­saqaly-tyn, — deidı Meiırhan aǧa. — Közı aşyq, Almaty mal därıgerlık institutyn bıtırgen, ǧylym doktory. Almatynyŋ ırgesındegı «Krasnyi vostok» auylyndaǧy saiajaiynda 4-5 jıgıt­tıŋ basyn qosyp, şeberhana aşqan. «Miras» käsıpornynyŋ ne­gızın qalaǧan sol jıgıtter. Menıŋ de ızdegenım osyndai qai­naǧan orta edı. Sol jıgıtter naiza, qylyş, sadaq, er-tūrman, qamşy, ne kerek qazaqtyŋ köne qolöner būiymdarynyŋ bärın jasaidy. Sol jerde taban audarmai 8 ai boiy jūmys ıstep, ıstıŋ qyr-syryn üirenıp şyqtym. Qazaq­tyŋ asa myqty şeberı Därkembai Şoqparov ta sol jerge jiı ke­letın. Olardyŋ äŋgımesın estıdık, üirendık. Negızı, bıraz uaqyt jū­myssyz otyrǧan adam özı qalaǧan ısımen ainalyssa, şarşau degen­nıŋ ne ekenın bılmeidı eken. Düniejüzı qazaqtarynyŋ alǧaş­qy qūryltaiy kezınde 10 künnıŋ ışınde qaiysty tarta-tarta qol­dyŋ qanap, jara bolyp ketkenıne qaramai 8 qamşy jasap, eŋbek ettık.
Qolöner jasauǧa bıraz maşyq­tanyp alǧan soŋ, Meiırhan Jū­ma­taiūly özı tuyp-ösken auylǧa qaityp keldı. Sol kezde aǧasy Mäjit taǧy da qolūşyn sozyp, auyldan şeberhana aşyp, qūral-saimandaryn alyp berdı. Mıne, osylaişa jūmys döŋgelenıp jüre berdı.

Qazır Meiırhan aǧanyŋ üiınde 140 jyldyq tarihy bar er tūr. Eskınıŋ közın attai qalap iesınen satyp alǧan. Ünemı qoldanysta bolǧanyna qaramai, älı jaŋadan jasalǧandai ädemı qalpynda. Osyndai dünielerden sol kez­derdegı şeberlerdıŋ deŋgeiın bai­qauǧa bolady. Mūndai dünienı qolmen ūstap, közben körgenge ne jetsın?!

Bır kezderı Mäkeŋnıŋ qasynda jürıp qolöner būiymdaryn ja­sau­dyŋ qyr-syryn üirengen tört şäkırtı bolǧan. Qazır olar bala­ly-şaǧaly bolyp öz betterımen kettı. Quanarlyǧy, öz balala­ry­nyŋ äkeden körgen önerdı qaǧyp alyp, üirenuge ynta-yqyla­synyŋ barlyǧy. Jetı bala baǧyp-qaǧyp ösırıp otyrǧan Danyş­panovtar otbasy kündelıktı nä­paqasyn osy önerlerı arqyly tauyp otyr deuge bolady. Jetı balanyŋ üşeuı — ekı qyz, bır ūl dünieden erterek ozyp ketken aǧa-jeŋgesınıŋ amanaty Meiır­han­nyŋ qamqorlyǧynda. Qyzy Gülşattan tuǧan ekı jien nemeresı Jomart pen Maqsattyŋ atasynyŋ ärbır būiymyn ūstap körıp, keregın äkelıp berıp qasynda jü­retını ülken quanyş. «Menıŋ naǧyz kömekşılerım osy ekeuı» deidı Mäkeŋ riza köŋılmen. Demek, qazaqtyŋ qolöner būiym­daryn jasaityn kışkentai şe­berler ösıp keledı. Bügın erdıŋ jasy 50-ge tolyp otyrǧan Meiır­han aǧanyŋ bolaşaqta jasasam degen ūlttyq qolöner būiymdary barşylyq. Sol üşın tynbai ızdenıp, eŋbektenıp keledı. Al eŋbek jasaǧan adam qaşan da mū­rat-maqsatyna jeterı dausyz.