Qazaǵymnyń qolóner buıymdarynyń máninde ashylmaǵan kóp syr jatyr. Sol bir ónerdi atadan balaǵa mura etip kele jatqan jerdiń biri «Kók shoqy» sheberler aýyly bolyp eseptelinedi. Elimizde áli kúnge deıin ónerin jurt estimegen azamattarymyz qanshama? Sheberler aýyly turǵyndarynyń 80 paıyzy qolóner buıymdaryn daıarlaýmen aınalysady eken.
Jýyrda QazUAÝ -dyń, Júsipbek Elebekov atyndaǵy estrada jáne ırk kolledjiniń, QazUÝ-dyń stýdentteri «Adyrna» ulttyq-etnografııalyq birlestiginiń uıymdastyrýymen bas qosty. Stýdentterge sheberler ózderiniń sheberhanalaryn kórsetip, óz qolónerlerimen tańystyrdy.
Pa, shirkin! Sheberlerdiń qoldarynan jasalǵan, árbir oıý-órnegi ásem bezendirilgen zergerlik buıymdar men ártúrli materıaldardan jasalǵan er-turmandar jáne aǵashtan órnektelgen keremet dybys beretin san qıly mýzykalyq aspaptardy kózben kórip, tanysqanǵa ne jetsin? Olardy óz qolymyzben ustap, jasalý tarıhymen tanysýdaǵy erekshe sezimdi sózben aıtyp jetkizý qıyn. Mundaı maǵynaly saparlar ata-dástúrge degen mahabbatty mazdata túsirinde shek joq. Kórkem qolónerge degen qyzyǵýshylyq stýdentterdi qýanyshqa bóledi.
Sheberlerdiń qolónerge degen súıispenshiligin aıtyp jetkizý múmkin emes. Ol jerden stýdentter Muhtar Naýryzbaev, Seken Nurǵalıev, Juldyz Bazarbaev, Erbol Ahmetov atty qoldarynan bal tamǵan sheberlermen tanysyp, ár buıymnyń shejiresinen habardar boldy. Muhtar Naýryzbaevtyń aıtýynsha, Qorqyt atanyń qobyzy jıde aǵashynan jasalǵan. Óıtkeni, Qorqyt meken etken syr boıynda jıdeden ózge aǵash óspeıdi eken. Osy sydy tańsyq derekterdiń ózi jastardyń boıyna orasan rýh berdi.
Bul sapar ata-baba dástúrin tanýmen qatar, oqý oryndar arasyndaǵy baılanysty nyǵaıtýǵa sep boldy.
Aıdana JAQANTAEVA,
QazUAÝ-dyń stýdenti
