9 sáýirde, Astana ýaqytymen tańǵy 9:00-den bastap AQSh Qytaıdan keletin taýarlarǵa ımporttyq baj salyǵyn 104 paıyzǵa deıin kóteredi, dep habarlaıdy "Adyrna" ulttyq portaly DW agenttigine silteme jasap.
Aq úıdiń baspasóz hatshysy Kerolaın Lıvıttiń aıtýynsha, jańa baj salyǵy Qytaı tarapy óz tarapynan engizgen jaýaptyq sharalardy alyp tastamaǵandyqtan engizilgen.
«Amerıka shabýylǵa ushyraǵanda, ol árdaıym odan da qatty jaýap beredi. Qytaı tarapynan jaýap qaıtarý — úlken qatelik», — dedi Lıvıtt.
Onyń sózinshe, Donald Tramp Qytaı Halyq Respýblıkasynyń tarıfter boıynsha kelisimge kelgisi keletinin biledi, biraq olar muny qalaı isteý kerektigin túsinbeıdi. Eger Beıjiń kelissózderge oralatyn bolsa, Tramptyń ustanymy ózgeredi dep sendirdi.
Buǵan deıin, Tramp Qytaı engizgen 34 paıyzdyq baj salyǵyn 8 sáýirge deıin alyp tastamasa, AQSh 9 sáýirde Qytaı ımportyna 50 paıyzdyq jańa salyq engizetinin eskertken bolatyn. Bul salyqtar buǵan deıin qoldanysta bolǵan 20 paıyzdyq baj salyǵyna jáne birneshe kún buryn jarııalanǵan 34 paıyzdyq arnaıy salyqqa qosylady. Osylaısha, barlyǵy 104 paıyzdyq baj salyǵy kúshine enedi.
8 sáýir kúni Qytaıdyń saýda mınıstrligi Tramptyń bul sheshimin qatelik ústine qatelik dep baǵalap, AQSh-tyń áreketine jaýap beretinin málimdedi.
«Biz óz quqyǵymyz ben múddemizdi qorǵaý úshin sheshimdi jaýap qaıtaramyz. AQSh engizip otyrǵan bul jahandyq tarıfter — halyqaralyq saýda erejelerine qaıshy, sýbektıvti jáne birjaqty baǵalaýǵa negizdelgen. Bul – klassıkalyq qorqytý saıasatynyń kórinisi», — delingen mınıstrlik taratqan málimdemede.
Qytaı tarapy AQSh-tyń talaptaryna eshqashan kóne qoımaıtynyn aıtyp, eger AQSh óz ustanymynan qaıtpasa, Qytaı sońyna deıin kúresetinin málim etti. Bul týraly Sınhýa agenttigi Qytaı saýda mınıstrliginiń ókiline silteme jasap habarlady.
Tramptyń bul sheshimi álem boıynsha saıası tulǵalar men ekonomıster tarapynan qatań synǵa ushyrady. Qor naryǵyndaǵy ındekster kúrt tómendedi, munaı baǵasy da aıtarlyqtaı quldyrady. Sarapshylardyń boljamynsha, bul jaǵdaı dúnıejúzilik tutyný baǵalarynyń ósýine jáne ekonomıkalyq ósimniń baıaýlaýyna alyp kelýi múmkin.
