Áleýmettik jelide Palestına men Sırııa qalalaryndaǵy bombalaý áreketterinen zardap shekken jurtqa kómek kórsetý maqsatynda qor ashylǵany aıtyldy, dep jazady «Adyrna» tilshisi.
Gaza men Idlıb qalalarynyń turǵyndaryna kómek qorynyń ashylǵany týraly aqparatty Facebook áleýmettik jelisinde Arbat.Medıa aqparat baslymynyń redaktory Syrym Itqulov bólisti.
Jazbada ıslamı bloger Elmıra Beısembaevanyń belgisiz bireýge Palestınaǵa kómek qarajaty dep 5221 dollar kólemindegi somany aýdarǵany kórsetilgen. Sondaı-aq elya_bey-diń storısinde qorǵa qarajat jınaýshy teolog, RANT (Respýblıkalyq aqparattyq-nasıhat toby) múshesi, ustaz Baýyrjan Otarbaevtyń akkaýntyn belgilep kórsetilgeni salynǵan.
Baýyrjan Otarbaev ınstagram paraqshasynda da óziniń rekvızıtteri kórsetilgen «Ýlfa» qaıyrymdylyq qory jaıly aqparatymen bólisipti. Odan bólek atalǵan paraqshada Lıvııa, Sırııa elderine dep buryn ashylǵan qor rekvızıtteriniń birneshe sýretteri turǵanyn baıqaýǵa bolady.
Alaıda birneshe ýaqyttan deıin jazbanyń qor jetekshisiniń paraqshasynan da, ony qoldap bólisken blogerlerdiń storısterinen de óship ketkeni baıqaldy. Qor maqsaty men qarajatynyń naqty qaıda aýdarylǵany týraly bilmek nıette habarlasqan telefon nómiri sóndirýli boldy. Jazǵan habarlamaǵa valıýtalyq erekshelikterge sáıkes halyqaralyq aqsha aýdarý esepshottaryn jiberdi. Onda aýdarym Túrkııa banki arqyly jasalatyny kórsetildi.
Jelide taraǵan aqparatqa áleýmettik jeli qoldanýshylary túrli pikir qaldyrýda. Facebook belsendisi Gúlmıra Sarbasova atalǵan jaıtqa qatysty HAMAS-ty qoldaıtyndarǵa qatysty elimizde shara qoldanylý kerek dep bólisti:
«Dinı sananyń radıkaldanýyna baılanysty Qazaqstanda HAMAS-ty qoldaýǵa erikti qaıyrymdylyqtan 6 myń dollarǵa jýyq qarajat jınalǵan. Búgin Hamasty qoldaıtyndar álemniń kez kelgen jerinde agressııa men zorlyq-zombylyqty moıyndap, ony jıhad dep ataıdy. Bul óz elinde, Qazaqstanda ruqsat etedi degen sóz! Qazaqstandyqtardyń, ásirese, jastardyń óz qatarlaryna kúndelikti alynýyn toqtata alatyn aldyn alý sharalary jasalaýy tıis, kórip turyp qalaı únsiz qalýǵa bolady?!» dedi ol.
Jelide jınalǵan somanyń naqty qaıda túskeni, kimderdiń qarajat jınap, kimdi qarjylandyryp jatqanyn talqylaǵan jurttyń jazbasy kóp. Sebep, qor uıymdastyrýshylarynyń dáleldi fotoesepteriniń bolmaýynda dep jazýda jurt.
«6 myń dollar PUAZ (Palestına ulttyq azattyq qozǵalysy) shottaryna nemese Kanada, Eýropalyq Odaq, Izraıl, Japonııa, AQSh jáne Saýd Arabııasy lańkestik uıym dep jarııalaǵan Hamasqa tikeleı túsedi. Halqymyz bul qarjynyń qazir soǵystan zardap shegip otyrǵan qarapaıym turǵyndarǵa jetpeıtinin túsinbeı me? Terrorızmdi qarjylandyrǵany úshin sankııalar erteń bizge kelmesin», «Óz elimizde ash, jalańash qansha halyq bar, nege solarǵa kómektespeske?», «Keremet qozǵalys. Adamdardy tiri qalqan retinde paıdalanatyndardy qarjylandyrý ıdeıasyn oılap tabý - bul shyn máninde kúshti qadam» dep jazýda jelidegi pikir ıeleri.
Aıta keteıik, HAMAS Qazaqstanda tyıym salynǵan "Musylman baýyrlar" (al-Ihvan al-Mýslımýn) uıymyna qarasty qurylym delinedi.
Dına LITPIN,
"Adyrna" ulttyq portaly
