Qarjylyq monitoring agenttıgı Perizat Qairattyŋ tuystary qylmystyq jolmen alynǧan aqşaǧa Dubaidan bırneşe päter satyp aldy degen aqparatty joqqa şyǧardy, dep habarlaidy «Adyrna» tılşısı.
Būǧan deiın anonimdı Telegram-arnalarynyŋ bırınde sottalǧan Perizat Qairattyŋ tuystarynyŋ Dubaida bırneşe päterı bar ekenı turaly aqparat jariialanǧan.
Agenttık mälımetınşe, tergeu barysynda barlyq qarjylyq operasiia jan-jaqty taldanyp, jymqyrylǧan qarajatty zaŋdastyru tızbegı anyqtalǧan. Perizat Qairat qaiyrymdylyqqa jinalǧan aqşany avtokölıkter men päterler satyp aluǧa, olardy jöndeuge jäne jihazben jabdyqtauǧa, qymbat kiım-keşek pen äşekei būiymdarǧa, biznes-klaspen ūşuǧa, sändı qonaqüilerde tūruǧa, meiramhanalar men oiyn-sauyq oryndaryna jūmsaǧan.
Sonymen qatar agenttık A. esımdı azamattyŋ otbasy müşelerımen qandai da bır qarjylyq esep aiyrysu jürgızılgenı anyqtalmaǧanyn habarlady. Jariialanymdarda söz bolǧan jyljymaityn mülık 2011–2019 jyldary, iaǧni «Biz Birgemiz Qazaqstan 2030» qory qūrylǧanǧa jäne Perizat Qairat qylmystyq äreketke barǧanǧa deiın satyp alynǧan.
Vedomstvonyŋ mälımetınşe, A. erlı-zaiyptylary 20 jyldan astam uaqyt boiy jyljymaityn mülık satyp alu jäne qaita satumen ainalysyp keledı. Olar Perizat Qairat pen onyŋ anasynan bölek tūryp, käsıpkerlık qyzmetın de derbes jürgızgen.
Agenttık Qylmystyq-prosestık kodekstıŋ 161-babyna säikes, mülıktı būǧattau men tärkıleuge onyŋ qylmystyq jolmen alynǧanyn rastaityn dälelder bolǧan jaǧdaida ǧana jol berıletının eske saldy. Sondai-aq küdıktılermen tuystyq bailanysynyŋ boluy özdıgınen adamdy qylmystyq jauapkerşılıkke tartuǧa nemese onyŋ mülkın tärkıleuge negız bola almaitynyn atap öttı.
Eske salaiyq, 2025 jylǧy 25 şıldede sot Perizat Qairatty 10 jylǧa, al onyŋ anasy Ǧaini Alaşbaevany 7 jylǧa bas bostandyǧynan aiyrǧan edı. «Biz Birgemiz» qoǧamdyq qorynyŋ būrynǧy basşysy adamdar tobymen aldyn ala söz bailasyp, asa ırı mölşerde alaiaqtyq jasaǧany jäne qylmystyq jolmen alynǧan aqşa men özge de mülıktı zaŋdastyrǧany (jylystatqany) üşın kınälı dep tanylǧan.
