Ózbekstan qarýly kúshterinde drondarmen kúres, robottardy qoldaný, áýe shabýylyna qarsy qorǵanys bólimsheleri, sondaı-aq jasandy ıntellekt tehnologııalaryn paıdalanatyn kıberqurylymdar paıda bolady. Mundaı tapsyrmany el prezıdenti Shavkat Mırzııoev Qaýipsizdik keńesiniń 21 aqpanda ótken otyrysynda berdi, dep habarlaıdy "Adyrna" ulttyq portaly Ferǵana agenttigine silteme jasap.
Prezıdenttiń aıtýynsha, armııany damytýda qazirgi zamanǵy áskerı qaqtyǵystar men soǵys júrgizý ádisterin eskerý qajet. Ásirese jasandy ıntellekt, robottandyrylǵan júıeler, zymyrandar men ushqyshsyz ushý apparattaryn keńinen qoldaný máselesine erekshe nazar aýdarý kerek.
Sonymen qatar, áskerı basqarýdyń biryńǵaı avtomattandyrylǵan júıesin ázirleý jáne kadrlardy daıarlaýdyń zamanaýı ádisterin engizý josparlanyp otyr.
Qaýipsizdik keńesiniń otyrysynda "Bas serjanttar korpýsyn" jetildirý, qorǵanys ónerkásibin damytý, áskerı qyzmetshilerdi áleýmettik qoldaý jáne jastardy patrıottyq rýhta tárbıeleý máseleleri de talqylandy.
Memleket áskerı qyzmetshilerdiń áleýmettik jaǵdaıyn jaqsartý sharalaryn jalǵastyryp keledi. Qazirge deıin 30 myń otbasy baspanamen qamtamasyz etilip, eki myńnan astam bala joǵary oqý oryndaryna túsý kezinde jeńildikter alǵan.
Ózbekstan qorǵanys-ónerkásip keshenin damytýdy jalǵastyrýda. Eldiń áskerı ónerkásibi jańa kásiporyndarmen tolyqty, al armııa halyqaralyq yntymaqtastyqty nyǵaıtý maqsatynda 20-dan astam elmen baılanys ornatyp, 400-den astam birlesken áskerı jattyǵýǵa qatysqan.
Prezıdent Shavkat Mırzııoev 21 aqpanda qorǵanys ónerkásibi agenttiginiń ınnovaııalyq tehnologııalar ortalyǵynda bolyp, jańa áskerı ázirlemelermen tanysty. Bul ortalyq 80-ge jýyq áskerı tehnıka túrin shyǵarady.
Ózbekstan halyqaralyq áskerı kórmelerge de belsendi qatysyp keledi. IDEX-2025 kórmesinde (BAÁ) eldiń áskerı tehnıkalary, onyń ishinde "Arslon 8x8" jáne "Arslon 6x6" bronetransporterleri, "Týfon" ózdiginen júretin gaýbıasy sheteldik seriktester tarapynan erekshe qyzyǵýshylyq týdyrdy.
