Qazaqstan Respublikasynyŋ Ǧylym jäne joǧary bılım ministrı Saiasat Nūrbek «Bolaşaq» baǧdarlamasynyŋ stipendiattaryna jas şekteuınıŋ engızılu sebebın tüsındırdı, dep habarlaidy "Adyrna" ūlttyq portaly.
Ministrdıŋ aituynşa, qazırgı taŋda Varşavada ǧylymi taǧylymdamadan ötıp jatqan «Bolaşaq» baǧdarlamasynyŋ ekı stipendiaty bar. Olardyŋ bırı — şamamen 70 jasta, ekınşısı — 68 jasta. Sondai-aq, taǧy bır tülek Reseide, Sankt-Peterburg memlekettık öner universitetınde 67–68 jasynda taǧylymdamadan ötken.
«Būǧan deiın baǧdarlamada jas şekteuı bolǧan – 45 jasqa deiın. 2012 jyly būl şekteu alynyp tastaldy, sebebı käsıbi taǧylymdamalarǧa 40 jastan asqan täjıribelı mamandardyŋ qatysuyna mümkındık beru qajet boldy. Qazır qaitadan jas şekteuı engızılıp otyr: taǧylymdamadan ötu üşın zeinet jasyna deiın kem degende üş jyl qaluy kerek. Iаǧni, er adamdar üşın şektı jas – 61 jas, äielder üşın – 57 jas. Būl özgerıster biyl küşıne enedı», – dedı ministr Mäjılıste.
Osylaişa, «Bolaşaq» baǧdarlamasymen stipendiia alu üşın ümıtkerdıŋ zeinetke şyǧuyna deiın mındettı üş jyl eŋbek ötılın öteuge jetkılıktı uaqyty boluy qajet. Mysaly, eger er adam 61 jasynda zeinetke şyqsa, al üş jyldyq jūmys ısteu talaby bolsa, ötınış bergen sätte jasy 58-den aspauy tiıs.
«Bolaşaq» halyqaralyq stipendiiasy tarihynda alǧaş ret jas şekteuı engızıldı. Endı er adamdar üşın şektı jas – 59, al äielder üşın – 57 jas. Būl talap būiryqpen bekıtılıp, küşıne endı.
Eske salaiyq, 14 nauryzda ötken Ūlttyq qūryltai otyrysynda Qazaqstan Prezidentı Qasym-Jomart Toqaev şeteldegı ǧalymdardyŋ taǧylymdamasy turaly pıkır bıldırgen bolatyn.
«Bız şetelde ǧalymdardy taǧylymdamadan ötkızu täjıribesın engızdık, bıraq şetelge ǧylymǧa qatysy joq adamdar baryp jatyr. Bır adamdy bılemın: ol 78 jasynda “Bolaşaqpen” oquǧa ketken. 78 jasta qandai “Bolaşaq”? Būl bärı tüsınıksız bır äreketke ainalyp barady», – degen edı Prezident.
Eske salaiyq, «Bolaşaq» – Qazaqstan Prezidentınıŋ halyqaralyq bılım beru stipendiiasy. Ol 1993 jylǧy 5 qaraşada elımızdıŋ ekonomikasynyŋ basym salalaryna qajettı kadrlardy daiarlau, qaita daiarlau jäne bılıktılıgın arttyru maqsatynda qūrylǧan.
