Qazaqstan Respýblıkasynyń Ǵylym jáne joǵary bilim mınıstri Saıasat Nurbek «Bolashaq» baǵdarlamasynyń stıpendıattaryna jas shekteýiniń engizilý sebebin túsindirdi, dep habarlaıdy "Adyrna" ulttyq portaly.
Mınıstrdiń aıtýynsha, qazirgi tańda Varshavada ǵylymı taǵylymdamadan ótip jatqan «Bolashaq» baǵdarlamasynyń eki stıpendıaty bar. Olardyń biri — shamamen 70 jasta, ekinshisi — 68 jasta. Sondaı-aq, taǵy bir túlek Reseıde, Sankt-Peterbýrg memlekettik óner ýnıversıtetinde 67–68 jasynda taǵylymdamadan ótken.
«Buǵan deıin baǵdarlamada jas shekteýi bolǵan – 45 jasqa deıin. 2012 jyly bul shekteý alynyp tastaldy, sebebi kásibı taǵylymdamalarǵa 40 jastan asqan tájirıbeli mamandardyń qatysýyna múmkindik berý qajet boldy. Qazir qaıtadan jas shekteýi engizilip otyr: taǵylymdamadan ótý úshin zeınet jasyna deıin kem degende úsh jyl qalýy kerek. Iaǵnı, er adamdar úshin shekti jas – 61 jas, áıelder úshin – 57 jas. Bul ózgerister bıyl kúshine enedi», – dedi mınıstr Májiliste.
Osylaısha, «Bolashaq» baǵdarlamasymen stıpendııa alý úshin úmitkerdiń zeınetke shyǵýyna deıin mindetti úsh jyl eńbek ótilin óteýge jetkilikti ýaqyty bolýy qajet. Mysaly, eger er adam 61 jasynda zeınetke shyqsa, al úsh jyldyq jumys isteý talaby bolsa, ótinish bergen sátte jasy 58-den aspaýy tıis.
«Bolashaq» halyqaralyq stıpendııasy tarıhynda alǵash ret jas shekteýi engizildi. Endi er adamdar úshin shekti jas – 59, al áıelder úshin – 57 jas. Bul talap buıryqpen bekitilip, kúshine endi.
Eske salaıyq, 14 naýryzda ótken Ulttyq quryltaı otyrysynda Qazaqstan Prezıdenti Qasym-Jomart Toqaev sheteldegi ǵalymdardyń taǵylymdamasy týraly pikir bildirgen bolatyn.
«Biz shetelde ǵalymdardy taǵylymdamadan ótkizý tájirıbesin engizdik, biraq shetelge ǵylymǵa qatysy joq adamdar baryp jatyr. Bir adamdy bilemin: ol 78 jasynda “Bolashaqpen” oqýǵa ketken. 78 jasta qandaı “Bolashaq”? Bul bári túsiniksiz bir áreketke aınalyp barady», – degen edi Prezıdent.
Eske salaıyq, «Bolashaq» – Qazaqstan Prezıdentiniń halyqaralyq bilim berý stıpendııasy. Ol 1993 jylǵy 5 qarashada elimizdiń ekonomıkasynyń basym salalaryna qajetti kadrlardy daıarlaý, qaıta daıarlaý jáne biliktiligin arttyrý maqsatynda qurylǵan.
