Özbekstan prezidentı Şavkat Mirziiaev Ändıjan oblysynyŋ tūrǧyndarymen kezdesude būl öŋırde salynyp jatqan jaŋa qalaǧa memleket jäne qoǧam qairatkerı, aqyn Zahiriddin Mūhammed Babyrdyŋ esımın berudı ūsyndy, dep habarlaidy "Adyrna" ūlttyq portaly Ferǧana agenttıgıne sılteme jasap.
Prezidenttıŋ aituynşa, Ändıjan – däl osy jerde Babyr düniege kelgendıgımen äigılı, sondyqtan ūly babanyŋ armanyn oryndau retınde jaŋa qalanyŋ onyŋ esımımen ataluy erekşe mänge ie bolady.
"Babyr Mirzo – Ämır Temır däuırınen keiıngı renessanstyŋ laiyqty jalǧastyruşysy, ǧylym, mädeniet, öner men ädebiettıŋ janaşyry, adamzat darynynyŋ ūly ökılı. Onyŋ bıregei mūrasy halqymyzdy bükıl älemge tanytty", – dedı Şavkat Mirziiaev.
Prezidenttıŋ sözınşe, jaŋa qalada auqymdy bılım beru klasterı – balabaqşalar, mektepter, universitet, muzei, kıtaphana men IT-park salynady. Universitet aumaǧynda halyqaralyq deŋgeidegı sport keşenı de boi köteredı.
Babyr qalasy ūlttyq qūndylyqtardy beineleitın ruhani ortalyq, jastar üşın şabyt közı, turizm men mädeniet ortalyǧy, sondai-aq ozyq tehnologiialarmen jabdyqtalǧan «aqyldy qala» bolady. Sondai-aq, osy aumaqtaǧy parktyŋ eŋ biık jerıne Babyrǧa arnap eskertkış ornatylmaq.
Şavkat Mirziiav būl jobany jüzege asyru üşın 250 million dollar bölıngenın atap öttı.
Aita keteiık, Ändıjan – Özbekstandaǧy eŋ tyǧyz qonystanǧan qala. El halqynyŋ 10%-y onyŋ 1% aumaǧynda tūrady. Osyǧan bailanysty 2021 jyly prezident Mirziiaev jaŋa qala salu bastamasyn kötergen bolatyn. Qazırgı sapary barysynda ol joba aiasynda ıske asyrylǧan alǧaşqy jūmystarmen tanysty.
Babyr esımı berılgen jaŋa qala Ändıjan audanyndaǧy 4 myŋ gektar aumaqta salynyp jatyr. Qala qūrylysy segız kezeŋmen jüzege asady.
Qala qūrylysy aiaqtalǧan soŋ Babyr qalasynda 410 myŋnan astam adam tūrady dep josparlanuda.
