وزبەكستان قارۋلى كۇشتەرىندە دروندارمەن كۇرەس، روبوتتاردى قولدانۋ، اۋە شابۋىلىنا قارسى قورعانىس بولىمشەلەرى، سونداي-اق جاساندى ينتەللەكت تەحنولوگيالارىن پايدالاناتىن كيبەرقۇرىلىمدار پايدا بولادى. مۇنداي تاپسىرمانى ەل پرەزيدەنتى شاۆكات ميرزيوەۆ قاۋىپسىزدىك كەڭەسىنىڭ 21 اقپاندا وتكەن وتىرىسىندا بەردى، دەپ حابارلايدى "ادىرنا" ۇلتتىق پورتالى فەرعانا اگەنتتىگىنە سىلتەمە جاساپ.
پرەزيدەنتتىڭ ايتۋىنشا، ارميانى دامىتۋدا قازىرگى زامانعى اسكەري قاقتىعىستار مەن سوعىس جۇرگىزۋ ادىستەرىن ەسكەرۋ قاجەت. اسىرەسە جاساندى ينتەللەكت، روبوتتاندىرىلعان جۇيەلەر، زىمىراندار مەن ۇشقىشسىز ۇشۋ اپپاراتتارىن كەڭىنەن قولدانۋ ماسەلەسىنە ەرەكشە نازار اۋدارۋ كەرەك.
سونىمەن قاتار، اسكەري باسقارۋدىڭ بىرىڭعاي اۆتوماتتاندىرىلعان جۇيەسىن ازىرلەۋ جانە كادرلاردى دايارلاۋدىڭ زاماناۋي ادىستەرىن ەنگىزۋ جوسپارلانىپ وتىر.
قاۋىپسىزدىك كەڭەسىنىڭ وتىرىسىندا "باس سەرجانتتار كورپۋسىن" جەتىلدىرۋ، قورعانىس ونەركاسىبىن دامىتۋ، اسكەري قىزمەتشىلەردى الەۋمەتتىك قولداۋ جانە جاستاردى پاتريوتتىق رۋحتا تاربيەلەۋ ماسەلەلەرى دە تالقىلاندى.
مەملەكەت اسكەري قىزمەتشىلەردىڭ الەۋمەتتىك جاعدايىن جاقسارتۋ شارالارىن جالعاستىرىپ كەلەدى. قازىرگە دەيىن 30 مىڭ وتباسى باسپانامەن قامتاماسىز ەتىلىپ، ەكى مىڭنان استام بالا جوعارى وقۋ ورىندارىنا ءتۇسۋ كەزىندە جەڭىلدىكتەر العان.
وزبەكستان قورعانىس-ونەركاسىپ كەشەنىن دامىتۋدى جالعاستىرۋدا. ەلدىڭ اسكەري ونەركاسىبى جاڭا كاسىپورىندارمەن تولىقتى، ال ارميا حالىقارالىق ىنتىماقتاستىقتى نىعايتۋ ماقساتىندا 20-دان استام ەلمەن بايلانىس ورناتىپ، 400-دەن استام بىرلەسكەن اسكەري جاتتىعۋعا قاتىسقان.
پرەزيدەنت شاۆكات ميرزيوەۆ 21 اقپاندا قورعانىس ونەركاسىبى اگەنتتىگىنىڭ يننوۆاتسيالىق تەحنولوگيالار ورتالىعىندا بولىپ، جاڭا اسكەري ازىرلەمەلەرمەن تانىستى. بۇل ورتالىق 80-گە جۋىق اسكەري تەحنيكا ءتۇرىن شىعارادى.
وزبەكستان حالىقارالىق اسكەري كورمەلەرگە دە بەلسەندى قاتىسىپ كەلەدى. IDEX-2025 كورمەسىندە ء(باا) ەلدىڭ اسكەري تەحنيكالارى، ونىڭ ىشىندە "ارسلون 8x8" جانە "ارسلون 6x6" برونەترانسپورتەرلەرى، "تۋفون" وزدىگىنەن جۇرەتىن گاۋبيتساسى شەتەلدىك سەرىكتەستەر تاراپىنان ەرەكشە قىزىعۋشىلىق تۋدىردى.
