Abaı oblysynyń Aıagóz aýdanynda úsh adam aǵash aspaly kópir arqyly motoıkl ótkizbek bolǵanda ózenge qulap ketken. Qutqarýshylar eki er adamnyń denesin tapty, úshinshi adamdy izdeý jumystary jalǵasyp jatyr, dep habarlaıdy "Adyrna" ulttyq portaly.
Oqıǵa 15 sáýirde bolǵan. Oblystyq Tótenshe jaǵdaılar departamentiniń málimetinshe, Aıakóz qalasyndaǵy «101» qutqarý qyzmetine Aqshaýly aýylynda tótenshe jaǵdaı oryn alǵany týraly habar túsken.
"Kýágerlerdiń aıtýynsha, úsh jumysshy Kókqamyr ýchaskesinde ornalasqan aǵash aspaly kópir arqyly motoıkldi ótkizbek bolǵan. Alaıda olar kópirden ózenge – Qarakólge qulap ketken. Oqıǵa ornynda olardyń uıaly telefondary men syrt kıimderi tabylǵan," – delingen Abaı oblysy TJD habarlamasynda.
Áleýmettik jelilerde taraǵan vıdeodan kópirdiń apatty jaǵdaıda ekeni, adam júrýge múldem jaramsyz ekeni baıqalady.
16 sáýirde qutqarýshylar men jergilikti bılik ókilderi eki er adamnyń denesin tapqan. Keıinirek, úshinshi adamnyń – 1967 jyly týǵan er adamnyń denesi oqıǵa ornynan eki shaqyrym jerden tabyldy.
Marqumdardyń barlyǵy – jergilikti sharýa qojalyǵynyń jumysshylary. Qutqarý jáne izdestirý jumystaryna TJD qyzmetkerleri, jergilikti ákimdik ókilderi, eriktiler jáne arnaıy tehnıka jumyldyryldy.
