Zańger ári qazaqtyń aıaýly aqyn qyzy Alma Túsipbekova qazaq tiline degen memlekettik bıliktiń qarym-qatynasyn ashyp jazyp, aqıqatyn aıtty. Onyń aıtýynsha, ana tilin bilmeý eshkimdi taǵynan taıdyra qoımaıdy, tipti, úırenýge joǵarydaǵyń qulqy da joq, dep habarlaıdy "Adyrna" ulttyq portaly.
Óleńdi ómirine serik etken qazaqtyń ójet qyzy, zańger Alma Túsipbekova qoǵamdaǵy qazaq tiliniń qoldanysyna qatysty shyndyqty ashyp aıtty:
- Bir aýyz qazaq tilin bilmeıtin sheneýikter úlken laýazymda otyr. Otyz jylda birneshe til úırenýge bolady. Biraq olarda qulyq joq. Sebebi til bilmeý - laýazym taǵyna kedergi keltirmeıdi. Bul degenimiz - memlekettik bılikte qazaq tilge degen suranys joq. Budan shyǵatyn qorytyndy til bilmeý bıliktiń úsh tarmaǵyna da suranys týdyrmaıdy.
Alaıda olar ózi qazaq tilin bilmese óz qyzmetkerlerinen qalaı talap etedi? Ekinshiden, Parlament áli kúnge deıin zańnamany orys tilinde qabyldaıdy. Áli kúnge deıin qazaq tilinde aýdarylǵan zań normalarynda qatelikter men kemshilikter jetip artylady...Máselen zań tilindegi termınniń bir ataýy kez-kelgen normatıvtik-quqyqtyq aktilerde ártúrli qoldanylady. Áli kúnge deıin zańnamada birizdilik joq...Aınalyp kelgende biz óz jerimizde, óz elimizde otyryp osyndaı sorly kúıge jettik. Áli kúnge deıin bizde jaltaqtyq basym...
Úshinshiden, memlekettik qyzmette áli kúnge deıin aýdarma til degen bar. Osy aýdarma búkil júıeniń túp-tamyryn shiritip otyr... Bar máseleniń túıini osynda jatyr...Sondyqtan aýdarma tilin qurdymǵa jiberý qajet.
Nesin jasyramyz memlekettegi eń birinshi adam - Toqaevtyń ózi ana tilinde durys sóıleı almaıdy ǵoı. Prezıdent eń birinshi halyqqa ózi úlgi tulǵa bolýy kerek!Al bizde bári kerisinshe... - dedi zańger.
Buǵan qatysty:
"Memlekettik qyzmette memlekettik tildi bilýge degen qajettilik joq. Solaı bolmaǵan soń eshteńe ózgermeı otyr. Memlekettik qyzmetke memlekettik tildi múltiksiz biletin jáne saýatty jaza alatyn adam ǵana qabyldanýy kerek. Osyndaı talap bolmaı otyr..." dep pikir bildirdi oqyrmandar.
"Adyrna" ulttyq portaly
