25 jeltoqsan kúni QR Mádenıet jáne aqparat mınıstrliginiń uıymdastyrýymen Halyq jazýshysy, Memlekettiń syılyqtyń laýreaty, kórnekti aqyn Farıza Ońǵarsynovanyń
85 jyldyǵyna arnalǵan «Poezııa padıshasy» atty saltanatty jıyn ótti.
Jıynǵa QR Mádenıet jáne aqparat mınıstri Aıda Balaeva, Qazaqstan Jazýshylar odaǵynyń tóraǵasy Mereke Qulkenov, Memleket jáne qoǵam qaıratkerleri Baqtyqoja Izmuhambetov, Qýanysh Sultanov pen zııaly qaýym ókilderi, aqynnyń týǵan týystary qatysty.
Saltanatty sharada alǵash sóz alǵan QR Mádenıet jáne aqparat mınıstri Aıda Balaeva:
- Búgin – Farıza apamyzdyń týǵan kúni. Aqyn kózi tiri bolsa 85 jasqa tolar edi. Búgingi is-sharany Ulttyq arhıvte ótkizýdiń ózindik máni bar. Sebebi osydan az ýaqyt buryn Farıza Ońǵarsynovanyń jeke qorynan qoljazbalary men qundy qujattar arhıvke tabystalǵan edi. Muqaǵalı Maqatev Farıza Ońǵarsynovaǵa arnaǵan jyrynda “arhıvterden tabylarmyz…” degen sóz aıtyp edi. Aqynnyń altyn qor, asyl muralary bolashaq farızatanýshylarǵa ólsheýsiz azyq bolyp, jańa múmkindikterge jol ashady dep senemin.
Farıza Ońǵarsynovanyń ónegeli ómir jolyn, óshpes murasyn ult bolyp ulyqtap, keıingi urpaqqa jetkizý – barshamyzǵa ortaq paryz, - dep salıqaly sóz sóıledi.
Budan soń memlekettik tapsyryspen jaryq kórgen «Farıza Ońǵarsynova «Tańdamaly» kitabynyń tusaýkeser rásimi ótti.
Sondaı-aq Qazaqstan Respýblıkasy Ulttyq arhıviniń dırektory S.Nurlanova aqynnyń uly Almas Ońǵarsynovqa Farıza Ońǵarsynovanyń jeke tektik qorynyń ashylýyn kýálandyratyn sertıfıkatty tabystady.
Aıta keteıik saltanatty jıyn aıasynda Farıza Ońǵarsynovanyń ómir derekterinen syr sherter qujattyq kórme uıymdastyryldy. Kórmege aqynnyń óz qolymen jazǵan otbasylyq shejiresi men ómirbaıany, «Kógershinderim» óleńder jınaǵynan qoljazbalar, «Dástúrdi bilesiń be?» t.b. oı-tolǵamdary, M. Maqataevtyń 60 jyldyǵynda sóılegen sózi, notalary men buryn-sońdy jarııalanbaǵan fotosýretteri jáne hattarynan jınaqtalǵan 50-ge jýyq qujattary qoıyldy.
Maıra Raımberdıeva
QR Ulttyq arhıviniń qyzmetkeri
