Búgin, 12 sáýir, kórnekti ǵalym, Qazaqstannan shyqqan tuńǵysh akademık Qanysh Imantaıuly Sátbaevtyń týǵanyna 126 jyl toldy. Osyǵan oraı, elimizdiń ár óńirinde ǵalymnyń eskertkishine gúl shoqtaryn qoıý rásimderi ótip, onyń ǵylym men bilim salasyna qosqan úlesi eske alyndy.
Qanysh Sátbaev 1899 jyly 12 sáýirde qazirgi Pavlodar oblysynyń Baıanaýyl aýdanynda dúnıege kelgen. Shyn esimi – Ǵabdýlǵanı. Anasy ony erkeletip “Ǵanıym”, “Ǵanyshym” dep ataǵan, keıin bul esim “Qanysh” bolyp ketken.
Bolashaq ǵalym bilim jolyn aýyl moldasynan bastap, Pavlodardaǵy orys-qazaq ýchılıesinde, Semeı muǵalimder semınarııasynda jalǵastyrdy. 1926 jyly Tomsk tehnologııa ınstıtýtynyń taý-ken fakýltetin bitirip, ınjener-geolog mamandyǵyn aldy.
Qanysh Sátbaev Jezqazǵan mys ken ornyn zerttep, onyń álemdegi iri ken oryndarynyń biri ekenin dáleldedi. Ol Qazaqstan Ǵylym akademııasynyń negizin qalap, onyń tuńǵysh prezıdenti boldy. Ǵalymnyń eńbekteri Qazaqstannyń mıneraldyq resýrstaryn zertteýge jáne geologııa ǵylymynyń damýyna zor úles qosty.
Qanysh Imantaıuly 1964 jyly 31 qańtarda Máskeý qalasynda qaıtys boldy. Búginde onyń esimimen atalatyn qala, ýnıversıtet, kósheler jáne kóptegen bilim berý mekemeleri bar.
