Ekibastuzdaǵy alaǵaı shaq bastalǵaly kúnine bes júz adamdy tegin tamaqtandyryp otyrǵan kásipker, halqynyń aıaly alaqynda terbetilgen azamat, júregi meıirimge tunǵan abzal ana Shattyq Eshmuratqyzy jaıly "Adyrna" ulttyq portaly qalam terbeıdi. Keıipkerdiń Ekibastuz halqyna kórsetken kómegi qalyń jurttyń nazaryn aýdardy.
- Balalarym osy jerde týǵan soń, Ekibastuz maǵan sondyq ystyq. Ózimniń elim dep sanaımyn. Halyqqa aıtarym, ókinishke qaraı, kim osyndaı qıyn jaǵdaıǵa tap bolsa, bizge júginse bolady. Kelińizder! Esh qysylmańyzdar. Tańǵy, túski, keshki as bar. Jatyn oryn bar. Esigimiz árdaıym ashyq. Birlesip, bir-birimizdi saqtaıyq, - deıdi júzinen shýaq shashylǵan Shattyq Eshmuratqyzy.
View this post on Instagram
Oraıy kelgende aıta keteıik, Shattyq Eshmuratqyzy 1962 jyldyń 29-jeltoqsanynda Atyraý oblysy Qurmanǵazy aýdanynda týǵan (burynǵy Gýrev oblysy, Teniz aýdany, Ganıýshkın aýyly). Qazaqtyń aqyn qyzy Farıza Ońǵarsynovamen bir mekende dúnıege kelgen. Ákesi Eshmurat pen anasy Alma apaıdyń ulttyq tálim-tárbıesinde jetilgen. Onyń meıirim tunǵan júzine qaraǵanymyzda Farıza Ońǵarsynovanyń "Qum ishinde búr jarǵan gúl" jyr-tirkesi oıǵa oralady.
Atalmysh vıdeosy feısbýk belsendisi Qýandyq Tanabas bólisti. Eńbektiń kórkin qyzdyryp, tabysyn halqynyń ıgiligi jolynda jumsaǵan janǵa Qazaq eliniń túkpir-túkpirinen tilektestik tanytyp jatqandar óte kóp:
"Kezinde, tabıǵaty ásem, tamasha kórikti bolǵan Teńiz aýdany, Gýrev oblysynda dúnıege kelip, rýhanı baılyqpen ósken, ımanjúzdi, ıbaly, tárbıeli Shattyq Eshmuratqyzymen zamandaspyn. Allanyń qalaýymen Kereký óńirinde óz teńin taýyp, shańyraq qurdy. Aman-esen júrińiz!",
"Qazaqtyń janashyrlaryna myń alǵys! Qazaqtyń qyzynyń kásibi dóńgelene bersin! Aman bolyp, urpaǵynyń qyzyǵyna kýá bolyp, uzaq jasap, ǵasyrdy eńsersin!",
"Júzi jyly hanym ekensiz. Alla razy bolsyn!" dep jazdy oqyrmandar.
"Adyrna" ulttyq portaly
