Búgin - Qazaqstan Respýblıkasynyń eńbek sińirgen qaıratkeri, aıtysker aqyn, qarymdy qalamger, dramatýrg, áıgili manasshy Baıanǵalı Álimjanov 70 jasqa toldy.
Baıanǵalı Taqanuly 1954 jyly 16 qazanda Aqmola oblysy (burynǵy Kókshetaý, Birjan sal aýdany) Stepnıak qalasynda, qarapaıym eńbekshiler otbasynda dúnıege kelgen.
Ákesi Álimjanov Taqan (1921-1996j) Uly Otan soǵysyna qatysqan. Anasy Ábisheva Bátıma (1918-1988j.). Ekeýi de zeınetke shyqqanǵa deıin keńsharda jumys istegen. B.Álimjanov Stepnıak qalasyndaǵy Abaı atyndaǵy orta mektepti 1971 jyly, 1977 jyly QazMÝ-dyń qazaq fılologııa fakýltetin bitirgen. 1987 jylǵa deıin Almaty qalasynda turǵan.
Sábıt Muqanovtyń murajaıynda ǵylymı qyzmetker, "Lenınshil jas", "Kitap jarshysy", "Qazaq ádebıeti" gazetterinde tilshi, "Qazaqfılm" kınostýdııasynda derekti fılmder men hronıka bóliminiń redaktory, «Baldyrǵan», "Juldyz" jýrnaldarynda proza, syn bólimderiniń redaktory bolyp qyzmet atqarǵan.
1987 jyly ata-anasyn kútý úshin týǵan aýdanynyń «Keńay» aýylyna zaıybymen (Álııa Baqyshqyzy Álimjanova, 1962 t.j., medıına qyzmetkeri) birge kóship kelip, 11 jyl aýylda turǵan.
Baıanǵalı oblystyq «Kókshetaý pravdasy» gazetiniń Eńbekshilder, Ýálıhanov, ýche aýdandary boıynsha menshikti tilshisi, Eńbekshilder aýdandyq mádenıet bóliminde tókpe aqyn bolyp jumys istegen. Ata-anasy dúnıeden ótkennen keıin, 1998 jyly Kókshetaý qalasyna kóship, 2001 jylǵa deıin Shahmet Husaıynov atyndaǵy oblystyq qazaq mýzykalyq-drama teatrynda sahna sheberi bolyp qyzmet atqarǵan. 2006-2014 jyldary Pań Nurmaǵambet kınostýdııasynyń kórkemdik jetekshisi bolǵan.
Baıanǵalı Álimjanov lırıkalyq, fılosofııalyq óleńder men elýge tarta poema, oqıǵaly jyrlardyń avtory.
Onyń óleń-jyrlary jeke kitap bolyp basylǵan "Aýyldyń aq samaly", "Ańyz ben aspan", tarıhı tulǵalar týraly kóptegen jınaqtarǵa engen jáne respýblıkamyzdyń bedeldi jýrnaldary "Amanat", "Juldyz", "Tań-Sholpan", "Daraboz", "Jańa Saryarqa", "Kókshetaý", "Qazaq tarıhy", "Geografııa" jýrnaldary, "Jıdebaı" almanaǵy men "Egemen Qazaqstan", "Qazaq ádebıeti", "Ana tili", "Zaman Qazaqstan", "Aıqyn", "Jas qazaq úni", "Almaty aqshamy", "Arqa ajary", "Jas Araı" t.b.gazetterinde jarııalanǵan.
B.Álimjanovtyń óleńderi «Jyr marjany» atty qazaq poezııasynyń 10 tomdyq antologııasyna , «Taksıdegi taǵdyrlar» poemasy «Qazaqtyń júz poemasy» atty 6 tomdyq antologııaǵa kirgen. B.Álimjanov kóptegen án teksterin jazǵan. «Ǵajaıyp kúı», «Ómirlik meniń serigim», «Qazaqstan», «Ókpeleme, janym», « Sen eshqashan ózgerme» jáne basqa da ánderi (mýz. Nurlan Álimjanov\ búkil elimizge áıgili boldy. B. Álimjanovtyń balalarǵa arnalǵan óleń-jyrlary da bar. Ásirese, álippe jáne álippe –jańyltpash óleńderi keńinen tanymal. B.Álimjanovtyń shyǵarmalary orys, aǵylshyn, ıspan,franýz, arab, qytaı, nemis, japon, túrik, tatar, bashqurt, ýdmýrt, ózbek, monǵol,uıǵyr, qaraqalpaq jáne qyrǵyz tilderine aýdarylǵan.
