Germaniia Ukrainaǧa IRIS-T zenittık-zymyran keşenınıŋ jaŋa ūşyru qondyrǧysyn berdı. Būl turaly Ukraina prezidentı Vladimir Zelenskii mälımdedı, dep habarlaidy "Adyrna".
Memleket basşysynyŋ aituynşa, Resei soŋǧy aptada Ukrainadaǧy azamattyq infraqūrylym nysandaryna jappai şabuyl jasaǧan. Atap aitqanda, Resei äskerı 2300 soqqy beruşı drondy, şamamen 1560 basqarylatyn aviasiialyq bombany jäne türlı ülgıdegı 108 zymyrandy qoldanǧan.
Zelenskiidıŋ sözınşe, Germaniia tarapynan körsetılıp jatqan äskeri qoldau myŋdaǧan adamnyŋ ömırın saqtap qaluǧa mümkındık berıp otyr.
«Keşe bız jaŋa IRIS-T ūşyru qondyrǧysyn aldyq. Adamdardy qorǧauǧa qosqan tūraqty ülesı üşın Germaniiaǧa alǧys bıldıremız. Osyndai quatty qoldaudyŋ arqasynda myŋdaǧan adamnyŋ ömırın saqtap qaluǧa mümkındık tudy», – dedı Ukraina prezidentı.
Sonymen qatar Zelenskii elge äue şabuylyna qarsy qorǧanys jüielerıne arnalǧan qosymşa zymyrandar qajet ekenın atap öttı. Onyŋ aituynşa, Reseidıŋ äue şabuyldarynyŋ qarqyndylyǧy joǧary bolyp otyrǧandyqtan, Ukraina qorǧanys äleuetın küşeituge müddelı.
IRIS-T – Germaniiada jasalǧan zamanaui äue şabuylyna qarsy qorǧanys jüiesı. Ol drondardy, ūşaqtardy, tıkūşaqtardy jäne qanatty zymyrandardy joiuǧa arnalǧan. Soǧys bastalǧaly berı Germaniia Ukrainaǧa bırneşe IRIS-T keşenın jetkızıp, eldıŋ äue qorǧanysyn nyǧaituǧa qoldau körsetıp keledı.
Ukraina bilıgı halyqaralyq serıktesterden qosymşa äue qorǧanys qūraldaryn beru mäselesı el qauıpsızdıgın qamtamasyz etudegı basty basymdyqtardyŋ bırı bolyp qala beretının mälımdedı.
