Shymkentte belgili aqyn, QR Parlamenti Májilisiniń depýtaty Qazybek Isanyń “Syrymdy aıttym dalaǵa” atty shyǵarmashylyq keshi ótti, dep habarlaıdy "Adyrna" ulttyq portaly.
Aqynnyń alpys jyldyq mereıtoıyna arnalǵan keshke qalamgerler, mádenıet jáne óner qaıratkerleri, jyrǵa jany asyq oqyrman qaýym qatysty. Mádenı keshke kelgen kórermender, aldymen, aqyn Qazybek Isa jaıly "Táýelsizdikke otyz jyl" atty derekti fılmdi tamashalady. Derekti fılmde Qazybek Isanyń ónegeli ómiri jaıly baıandalyp, qazaq tiliniń mártebesin nyǵaıtýǵa qosqan úlesi men ulttyq múddege qatysty oı-pikirleri sóz etildi.
Keshti aqyn, fılologııa ǵylymdarynyń doktory, professor, Ulttyq ǵylym akademııasynyń korrespendııa múshesi Baýyrjan Jaqyp tizgindedi.
"Túrkistan saraıyndaǵy úlken saltanatty toıǵa jınalyp otyrmyz. Qazaqtyń qarymdy qalamgeri, Memleket jáne qoǵam qaıratkeri, Parlament Májilisiniń depýtaty Qazybek Isanyń keshine qosh keldińizder", - dedi Baýyrjan Jaqyp.
Keıinnen halqynyń yqylasyna bólengen aqyn Qazybek Isanyń jyrlarynan shashý shashylyp, kórermen kóńilin lırıkalyq, jalyndy-patrıottyq, rýhty jyrlarymen terbedi.
Kesh barysynda qazaqtyń aıaýly aqyn qyzy Hanbıbi Esenqaraqyzy, Shymkent qalasy ákiminiń orynbasary Shyńǵys Muqan, "Aq jol" partııasynyń basshysy Azat Perýashev sóz alyp, jyr keshinen alǵan áserlerimen bólisti.
Sonymen qatar, mereıtoıǵa oraı týǵan ólkege arnaıy kelgen Qazybek Isa Túrkistan maqamdary negizinde jaryq kórgen «Tekti sózdiń tóresi» termeler jınaǵynyń tusaýyn kesti.
"Adyrna" ulttyq portaly
