Tūrarbek Qūsaiynūly özın Qazaqstan mūsylmandary dıni basqarmasynyŋ töraǧalyǧyna ümıtker retınde ūsyndy, dep habarlaidy "Adyrna" ūlttyq portaly.
Būǧan deiın äleumettık jelıde özın «imam» dep tanystyrǧan bolatyn. Keiınnen Atyrau oblystyq «İmanǧali» ortalyq meşıtınıŋ resmi saitynda mälımdeme paida boldy. Atyrau meşıtterınde imam retınde qyzmet atqarmaǧandyǧy anyqtaldy.
Tūrarbek Qūsaiynūly özın Bas müfti lauazymyna ūsynyp, mälımdeme jasady.
"Men, Tūrarbek Qūsaiynūly Qazaqstan mūsylmandary dıni basqarmasynyŋ töraǧasy ärı Bas müfti lauazymyna özımdı ümıtker retınde ūsynamyn.
Sızderdı Qazaqstan mūsylmandarynyŋ aldaǧy qūryltaiynda menıŋ kandidaturamdy qoldap, maǧan dauys beredı dep senemın.
Qazırgı Bas müfti Nauryzbai Ötpenovtyŋ tūsynda Qazaqstan mūsylmandary dıni basqarmasy jäne onyŋ qūrylymdyq jüiesı būryn-soŋdy bolmaǧan toqyrauǧa ūşyrady. İmamdar tarapynan qazaq qoǧamynda arazdyq pen alauyzdyq tudyratyn, äiel men bala jäne adam qūqyǧyn taptaityn mälımdemeler jasaldy, pätualar şyǧaryldy.
Mūnyŋ bärı tez arada müftiiattan bastap, bütkıl QMDB jüiesın tübegeilı reformalau qajettıgın körsetıp otyr. Atap aitqanda bas müfti N..Ötpenov pen müftiiat QMDB-ǧa reforma jasauǧa qūlyqty emes. Mūndai kelelı şaruany halyqtyŋ qoldauymen, demokratiialyq ädıspen sailanǧan jaŋa basşy ǧana jüzege asyra alady.
Eger men aldaǧy ötetın qūryltaida bas müfti bolsam, QMDB-da tömendegıdei özgerıs jasaimyn:
1. Müftiiat apparatyn 80 paiyzǧa, QMDB meşıtterındegı dın qyzmetkerlerı sanyn 50 paiyzǧa qysqartam. İmamdyqtan qysqartylǧan adamdardy dänekerleuşı, qūrylysşy, IT maman siiaqty jaŋa käsıp üirenetın ortalyqtarǧa baǧyttaimyn.
«Dın memleketten bölıngen» degen konstitusiialyq tezistı ıs jüzınde jüzege asyryp, QMDB-ny qoǧamdyq ūiym retınde demokratiialyq liberal keiıpke keltırem.
2. Men bas müfti bolsam, meşıt imamdary neke qiiu, janaza şyǧaru, at qoiu, sadaqa as sekıldı jiyndarda Qūran aiattaryn oqu sekıldı ıspen şūǧyldanbaidy. Mūndai räsımderdı ötkızu köptı körgen, ūlttyq salt dästürımızdı bıletın jergılıktı aqsaqaldarǧa berıledı.
Al imamdar tek meşıtte ǧana otyryp dın filosofiiasy men dınnıŋ adami qūndylyqtaryn nasihattau arqyly missionerlık turaly zaŋ aiasynan şyqpauy tiıs. İmamdardyŋ «qūranmen emdeu» sekıldı gipnozdyq psihologiialyq ädıs-täsılıne de tyiym salynady.
Halyq zamanaui medisinaǧa jügınsın.
3. Meşıt imamyn jergılıktı belsendı aqsaqaldar düiım mūsylman jamaǧatpen kelıse otyryp özderı sailap alady.
Sailanǧan imamdy bas müfti būiyrǧymen «taǧaiyndaldy» dep qana räsımdep beredı. Ärbır meşıt müftiiattan täuelsız äreket etedı, bas müfti men müftiiattyŋ ökılettılıgı jūmysty üilestıru ǧana, ökılettık osy şekten aspauy tiıs.
4. QMDB jarǧysyndaǧy «meşıt tüsımnıŋ 30 paiyzyn müftiiatqa beruı tiıs» degen mındet joiylady.
Meşıtterge tüsken zeket, pıtır-sadaqa jäne basqa da tüsım, meşıtterge qoiylǧan qaiyrymdylyq jäşıgı men kapigold kartasy arqyly jergılıktı aqsaqaldardyŋ tıkelei qadaǧalauynda bolady, jamaǧat jinalǧan qarjyny meşıt qajetıne keŋesıp jūmsaidy.
İmam özıne berılgen jalaqyny mıse tūtyp, şaruaşylq ısterge aralaspauy tiıs.
5. Meşıtqa pıtır-sadaqa berudı jäne ony barlyq mūsylmandarǧa mındetteudı toqtatam. Meşıtte pıtır-sadaqa beru sol dıni ǧimarattyŋ jyluy men jaryǧyn, ystyq-suyq suyn paidalanyp jürgen namazhan jamaǧat qana tölesın.
Sebebı, pıtır degen zaiyrly memleket zaŋynda tabys salyǧy dep atalady.
Mūndai salyqty qazaqstandyqtar memleketke tölep otyr. Zeket te ortaǧasyrdaǧy mülık salyǧynyŋ bır türı. Sondyqtan qazaqstandyqtar mülık salyǧyn tek memleketke ǧana töleuı tiıs. Aşyǧyn aitqanda mūsylman jamaǧatynyŋ meşıtke pıtır men zeket töleuı Qūranda mındettelmegen.
Büite bersek, onsyz da kedeişılıkten küizelıske ūşyraǧan halqymyzǧa psihologiialyq jäne qarjy auyrtpalyǧyn saludy taǧy da küşeitemız.
Mūndai auyrtpalyqty halqymyz kötere almaidy.
Sol üşın QMDB jüiesındegı «Zeket» siiaqty halyqtan aqşa jinaityn köptegen qorlardy jabamyn. Zeket, pıtır-sadaqa jönındegı pätualardyŋ küşın joiamyn.
6. Toǧyz millionǧa juyq qazaqstandyq ärtürlı nesienıŋ qamytyn kiıp otyr. Būl soma bırneşe trilliondy qūraidy. Nesie qamytynyŋ auyrtpalyǧy mūsylmanddardyŋ bala-şaǧa men tuǧan-tuysynyŋ da äleumettık jaǧdaiyn qiyndatyp jıberdı. Kedei-kepşıktıŋ sany tym köbeiıp kettı. Sondyqtan 5 jylǧa umra jäne ülken qajylyqqa moratorii jariialaimyn.
İmamdar kerısınşe «Saudiia sekıldı teokratiialyq arab elıne baryp aqşa şaşqanşa, sol qarjy elde qalsyn, ony kedei-kepşıkke kömek retınde berıŋder» dep nasihat jürgızuı tiıs.
QŪRMETTI QAZAQ ELI!
QŪRMETTI QAZAQSTAN MŪSYLMANDARY!!!
Eger menıŋ kandidaturamdy qoldap, Sızderdıŋ qalauyŋyzben bas müfti bolyp sailansam, elımız üşın joǧaryda aitylǧan tezisten basqa da paidaly reforma jasaimyn.
Halyq taily-tūiaǧymen dınge qyzmet etpeuı kerek. Qaita dın halyqtyŋ igılıgın, ösıp-örkendep damuy men bai-baquat ömır süruıne motivasiialyq qūraly boluy tiıs.
Ol üşın QMDB-ny ortaǧasyrlyq dogmalyq kertarpa ılımnen aryltyp zamanaui baǧytqa būru qajet. QMDB - qoǧamdyq ūiym. Sondyqtan men müftiiattaǧy diktaturalyq, avtokratiialyq basqaru täsılın, bas müftige közsız tabynudy tübırımen joiamyn, QMDB-ny o bastaǧy demokratiialyq jarǧysyna säikestendırem.
Maǧan senım artyŋyzdar! Qazaqty qaraŋǧylyqtan şyǧaryp, jarqyn bolaşaqqa bastaityn osy kelelı ıste menıŋ qoldaŋyzdar!" - dep jazylǧan imamnyŋ ündeuınde.
Ūqsas jaŋalyqtar
