تۇراربەك قۇسايىنۇلى ءوزىن قازاقستان مۇسىلماندارى ءدىني باسقارماسىنىڭ توراعالىعىنا ۇمىتكەر رەتىندە ۇسىندى، دەپ حابارلايدى "ادىرنا" ۇلتتىق پورتالى.
بۇعان دەيىن الەۋمەتتىك جەلىدە ءوزىن «يمام» دەپ تانىستىرعان بولاتىن. كەيىننەن اتىراۋ وبلىستىق «يمانعالي» ورتالىق مەشىتىنىڭ رەسمي سايتىندا مالىمدەمە پايدا بولدى. اتىراۋ مەشىتتەرىندە يمام رەتىندە قىزمەت اتقارماعاندىعى انىقتالدى.
تۇراربەك قۇسايىنۇلى ءوزىن باس ءمۇفتي لاۋازىمىنا ۇسىنىپ، مالىمدەمە جاسادى.
"مەن، تۇراربەك قۇسايىنۇلى قازاقستان مۇسىلماندارى ءدىني باسقارماسىنىڭ توراعاسى ءارى باس ءمۇفتي لاۋازىمىنا ءوزىمدى ۇمىتكەر رەتىندە ۇسىنامىن.
سىزدەردى قازاقستان مۇسىلماندارىنىڭ الداعى قۇرىلتايىندا مەنىڭ كانديداتۋرامدى قولداپ، ماعان داۋىس بەرەدى دەپ سەنەمىن.
قازىرگى باس ءمۇفتي ناۋرىزباي وتپەنوۆتىڭ تۇسىندا قازاقستان مۇسىلماندارى ءدىني باسقارماسى جانە ونىڭ قۇرىلىمدىق جۇيەسى بۇرىن-سوڭدى بولماعان توقىراۋعا ۇشىرادى. يمامدار تاراپىنان قازاق قوعامىندا ارازدىق پەن الاۋىزدىق تۋدىراتىن، ايەل مەن بالا جانە ادام قۇقىعىن تاپتايتىن مالىمدەمەلەر جاسالدى، ءپاتۋالار شىعارىلدى.
مۇنىڭ ءبارى تەز ارادا ءمۇفتياتتان باستاپ، بۇتكىل قمدب جۇيەسىن تۇبەگەيلى رەفورمالاۋ قاجەتتىگىن كورسەتىپ وتىر. اتاپ ايتقاندا باس ءمۇفتي ن..وتپەنوۆ پەن ءمۇفتيات قمدب-عا رەفورما جاساۋعا قۇلىقتى ەمەس. مۇنداي كەلەلى شارۋانى حالىقتىڭ قولداۋىمەن، دەموكراتيالىق ادىسپەن سايلانعان جاڭا باسشى عانا جۇزەگە اسىرا الادى.
ەگەر مەن الداعى وتەتىن قۇرىلتايدا باس ءمۇفتي بولسام، قمدب-دا تومەندەگىدەي وزگەرىس جاسايمىن:
1. ءمۇفتيات اپپاراتىن 80 پايىزعا، قمدب مەشىتتەرىندەگى ءدىن قىزمەتكەرلەرى سانىن 50 پايىزعا قىسقارتام. يمامدىقتان قىسقارتىلعان ادامداردى دانەكەرلەۋشى، قۇرىلىسشى، ءىت مامان سياقتى جاڭا كاسىپ ۇيرەنەتىن ورتالىقتارعا باعىتتايمىن.
«ءدىن مەملەكەتتەن بولىنگەن» دەگەن كونستيتۋتسيالىق تەزيستى ءىس جۇزىندە جۇزەگە اسىرىپ، قمدب-نى قوعامدىق ۇيىم رەتىندە دەموكراتيالىق ليبەرال كەيىپكە كەلتىرەم.
2. مەن باس ءمۇفتي بولسام، مەشىت يمامدارى نەكە قيۋ، جانازا شىعارۋ، ات قويۋ، ساداقا اس سەكىلدى جيىنداردا قۇران اياتتارىن وقۋ سەكىلدى ىسپەن شۇعىلدانبايدى. مۇنداي راسىمدەردى وتكىزۋ كوپتى كورگەن، ۇلتتىق سالت ءداستۇرىمىزدى بىلەتىن جەرگىلىكتى اقساقالدارعا بەرىلەدى.
ال يمامدار تەك مەشىتتە عانا وتىرىپ ءدىن فيلوسوفياسى مەن ءدىننىڭ ادامي قۇندىلىقتارىن ناسيحاتتاۋ ارقىلى ميسسيونەرلىك تۋرالى زاڭ اياسىنان شىقپاۋى ءتيىس. يمامداردىڭ «قۇرانمەن ەمدەۋ» سەكىلدى گيپنوزدىق پسيحولوگيالىق ءادىس-تاسىلىنە دە تىيىم سالىنادى.
حالىق زاماناۋي مەديتسيناعا جۇگىنسىن.
3. مەشىت يمامىن جەرگىلىكتى بەلسەندى اقساقالدار ءدۇيىم مۇسىلمان جاماعاتپەن كەلىسە وتىرىپ وزدەرى سايلاپ الادى.
سايلانعان يمامدى باس ءمۇفتي بۇيىرعىمەن «تاعايىندالدى» دەپ قانا راسىمدەپ بەرەدى. ءاربىر مەشىت ءمۇفتياتتان تاۋەلسىز ارەكەت ەتەدى، باس ءمۇفتي مەن ءمۇفتياتتىڭ وكىلەتتىلىگى جۇمىستى ۇيلەستىرۋ عانا، وكىلەتتىك وسى شەكتەن اسپاۋى ءتيىس.
4. قمدب جارعىسىنداعى «مەشىت ءتۇسىمنىڭ 30 پايىزىن مۇفتياتقا بەرۋى ءتيىس» دەگەن مىندەت جويىلادى.
مەشىتتەرگە تۇسكەن زەكەت، ءپىتىر-ساداقا جانە باسقا دا ءتۇسىم، مەشىتتەرگە قويىلعان قايىرىمدىلىق جاشىگى مەن كاپيگولد كارتاسى ارقىلى جەرگىلىكتى اقساقالداردىڭ تىكەلەي قاداعالاۋىندا بولادى، جاماعات جينالعان قارجىنى مەشىت قاجەتىنە كەڭەسىپ جۇمسايدى.
يمام وزىنە بەرىلگەن جالاقىنى مىسە تۇتىپ، شارۋاشىلق ىستەرگە ارالاسپاۋى ءتيىس.
5. مەشىتقا ءپىتىر-ساداقا بەرۋدى جانە ونى بارلىق مۇسىلماندارعا مىندەتتەۋدى توقتاتام. مەشىتتە ءپىتىر-ساداقا بەرۋ سول ءدىني عيماراتتىڭ جىلۋى مەن جارىعىن، ىستىق-سۋىق سۋىن پايدالانىپ جۇرگەن نامازحان جاماعات قانا تولەسىن.
سەبەبى، ءپىتىر دەگەن زايىرلى مەملەكەت زاڭىندا تابىس سالىعى دەپ اتالادى.
مۇنداي سالىقتى قازاقستاندىقتار مەملەكەتكە تولەپ وتىر. زەكەت تە ورتاعاسىرداعى مۇلىك سالىعىنىڭ ءبىر ءتۇرى. سوندىقتان قازاقستاندىقتار مۇلىك سالىعىن تەك مەملەكەتكە عانا تولەۋى ءتيىس. اشىعىن ايتقاندا مۇسىلمان جاماعاتىنىڭ مەشىتكە ءپىتىر مەن زەكەت تولەۋى قۇراندا مىندەتتەلمەگەن.
بۇيتە بەرسەك، ونسىز دا كەدەيشىلىكتەن كۇيزەلىسكە ۇشىراعان حالقىمىزعا پسيحولوگيالىق جانە قارجى اۋىرتپالىعىن سالۋدى تاعى دا كۇشەيتەمىز.
مۇنداي اۋىرتپالىقتى حالقىمىز كوتەرە المايدى.
سول ءۇشىن قمدب جۇيەسىندەگى «زەكەت» سياقتى حالىقتان اقشا جينايتىن كوپتەگەن قورلاردى جابامىن. زەكەت، ءپىتىر-ساداقا جونىندەگى ءپاتۋالاردىڭ كۇشىن جويامىن.
6. توعىز ميلليونعا جۋىق قازاقستاندىق ءارتۇرلى نەسيەنىڭ قامىتىن كيىپ وتىر. بۇل سوما بىرنەشە تريلليوندى قۇرايدى. نەسيە قامىتىنىڭ اۋىرتپالىعى مۇسىلماندداردىڭ بالا-شاعا مەن تۋعان-تۋىسىنىڭ دا الەۋمەتتىك جاعدايىن قيىنداتىپ جىبەردى. كەدەي-كەپشىكتىڭ سانى تىم كوبەيىپ كەتتى. سوندىقتان 5 جىلعا ۋمرا جانە ۇلكەن قاجىلىققا موراتوري جاريالايمىن.
يمامدار كەرىسىنشە «ساۋديا سەكىلدى تەوكراتيالىق اراب ەلىنە بارىپ اقشا شاشقانشا، سول قارجى ەلدە قالسىن، ونى كەدەي-كەپشىككە كومەك رەتىندە بەرىڭدەر» دەپ ناسيحات جۇرگىزۋى ءتيىس.
قۇرمەتتى قازاق ەلى!
قۇرمەتتى قازاقستان مۇسىلماندارى!!!
ەگەر مەنىڭ كانديداتۋرامدى قولداپ، سىزدەردىڭ قالاۋىڭىزبەن باس ءمۇفتي بولىپ سايلانسام، ەلىمىز ءۇشىن جوعارىدا ايتىلعان تەزيستەن باسقا دا پايدالى رەفورما جاسايمىن.
حالىق تايلى-تۇياعىمەن دىنگە قىزمەت ەتپەۋى كەرەك. قايتا ءدىن حالىقتىڭ يگىلىگىن، ءوسىپ-وركەندەپ دامۋى مەن باي-باقۋات ءومىر سۇرۋىنە موتيۆاتسيالىق قۇرالى بولۋى ءتيىس.
ول ءۇشىن قمدب-نى ورتاعاسىرلىق دوگمالىق كەرتارپا ىلىمنەن ارىلتىپ زاماناۋي باعىتقا بۇرۋ قاجەت. قمدب - قوعامدىق ۇيىم. سوندىقتان مەن مۇفتياتتاعى ديكتاتۋرالىق، اۆتوكراتيالىق باسقارۋ ءتاسىلىن، باس مۇفتيگە كوزسىز تابىنۋدى تۇبىرىمەن جويامىن، قمدب-نى و باستاعى دەموكراتيالىق جارعىسىنا سايكەستەندىرەم.
ماعان سەنىم ارتىڭىزدار! قازاقتى قاراڭعىلىقتان شىعارىپ، جارقىن بولاشاققا باستايتىن وسى كەلەلى ىستە مەنىڭ قولداڭىزدار!" - دەپ جازىلعان يمامنىڭ ۇندەۋىندە.
