QMDB Sharıǵat jáne pátýa bólimi áıelderdiń meshitte namaz oqýyna qatysty óz sheshimin jarııa etti, dep habarlaıdy “Adyrna” ulttyq portaly Informburo.kz-ke siltep.
Oǵan sáıkes, áıelderdiń meshitke baryp jamaǵatpen namaz oqýynyń oqasy joq. Degenmen, olardyń úıinde oqyǵany abzal.
Bólim sarapshylary bul rette Muhammed paıǵambardyń "Áıelderińe meshitke barýǵa tyıym salmańdar. Biraq úıleri olar úshin meshitke barýdan da qaıyrly", – degen sózin alǵa tartady.
"Hanafı mázhabynyń ǵalymdary fıtnaǵa (buzaqylyq) túsip qalý qaýpi bolǵandyqtan jas áıelderdiń meshitke baryp jamaǵatpen namaz oqýyn mákrýh sanaǵan. Sebebi Alla elshisi: "Úıleri olar úshin meshitke barýdan da qaıyrly", – degen. Al jasy úlken qart áıelderdiń tań jáne aqsham men quptan namazdarynda meshitke barýyna bolady. Bul ımam Ábý Hanıfanyń kózqarasy. Óıtkeni nıeti buzaqylar besin men ekinti namazynda qaptap júredi. Aqsham namazynda keshki asyn ishýmen álek, tań namazy men quptanda uıqyda bolady deıdi. Ábý Iýsýf pen Muhammedtiń pikiri boıynsha qart áıelder barlyq paryz namazdarda meshitke bara alady", – delingen QMDB Sharıǵat jáne pátýa bóliminiń habarlamasynda.
QMDB ustanymy boıynsha, meshitte áıelderge arnalǵan bólek jer bolsa jáne ol jerge barar jol da kópshilikke kórinbeıtindeı bolsa, oqasy joq. Basty maqsat – áıeldiń abyroıy men qoǵamda túrli búlikterdiń týýyna jol bermeý.