Prezıdenttikke kandıdat Saltanat Tursynbekova Qostanaıda quqyq qorǵaýshylarmen jáne zańgerlermen kezdesý ótkizdi. Onda ol eldegi basshylyq qyzmettegi áıelderdiń quzyrettiligi tómen ekenin aıtty.
«Qazaqstandaǵy basshylyq laýazymdardaǵy genderlik ókildiktiń jaǵdaıy asa máz emes. Áıelder el halqynyń basym bóligin qurasa da, basshylyq qyzmettegi áıelder sany óte az. Quzyrettilik joqtyǵynan áıelderdiń pikiri eskerilmeıdi», - dedi ol.
Ulttyq statıstıka bıýrosynyń málimeti boıynsha Qazaqstan Respýblıkasynyń halqy 19 mıllıon adamdy quraıdy, onyń 52 paıyzy – áıelder. 2020 jylǵy esepke sáıkes, elimizde jumys isteıtin árbir ekinshi áıeldiń (47,3%) joǵary nemese joǵary oqý ornynan keıingi bilimi boldy. Joǵary bilimdi jumyspen qamtylǵan erlerdiń úlesi nebári 38,1% quraıdy.
«Bizdiń elde áıelder kóp, olardyń arasynda bilimdisi de kóp. Biraq basshylyq qyzmetterde kózge kórinetin teńgerimsizdik bar. Oǵan myna jaǵdaılardy mysal retinde alýǵa bolady: qazir bizde oblys nemese respýblıkalyq mańyzy bar qalanyń birde-bir áıel ákimi joq. Tek eki áıel mınıstr bar. Sodan keıin olar ádettegideı áıelder ǵana basqaratyn - densaýlyq saqtaý men áleýmettik qorǵaý salalary. Parlamenttegi áıelderdiń sany úshten birine de jetpeıdi», - deıdi ol.
Sondaı-aq spıker partııalyq tizimderge áıelder men jastardyń kem degende 30 paıyzy kirýi kerek degen kvota týraly da aıtty.
«Búginde zańnamada áıelder quqyǵyn shekteıtin belgili bir 30%-dyq kvotalar qarastyrylǵan. Men bul kvotalarmen múlde kelispeımin. Basqa eshbir elde mundaı nárse is júzinde jasalyp jatqan joq. Bul 30%-dyq norma bolatyndaı qandaı da bir ónim emes qoı. Men áıel de er azamattar isteıtin barlyq laýazymdarda qyzmet etýi kerek dep esepteımin. Quzyrettilik teń bolýy kerek! Eger bizde halyqtyń 52 paıyzy áıelder bolsa, Parlamenttegi, kvazımemlekettik sektordaǵy, kez kelgen saladaǵy áıelderdiń úlesi kem degende 50 paıyz bolýy tıis. Men óz baǵdarlamamda genderlik teńdik týraly da aıtyp júrmin», – deıdi Saltanat Tursynbekova.
Eske salaıyq, Qostanaı oblysy – kandıdattyń saılaý aldyndaǵy úgit-nasıhat sapary aıasyndaǵy jetinshi óńir. Munda ol №4. emhananyń dárigerlerimen kezdesý ótkizdi. Quqyq qorǵaýshy buǵan deıin elordada, Almaty, Shymkent qalalarynda, Qaraǵandy, Aqmola jáne Túrkistan oblystarynda bolǵan.
