Búkil álem kóz tikken tórtjyldyqtyń basty dodasy 11 tamyzdan 12 tamyzǵa qaraǵan túni resmı túrde aıaqtaldy. Jabylý saltanaty «Stad de Frans» stadıonynda ótti.
2024 jylǵy Parıj Olımpıadasy óziniń jarqyn jeńisterimen, sporttyq jetistikterimen ǵana emes, sonymen qatar jurtshylyqtyń tańdaı qaqtyrǵan birqatar mańyzdy sátterimen esinde qaldy.
DAÝǴA ULASQAN AShYLÝ SALTANATY
Parıjdegi HHHIII Jazǵy Olımpıada oıyndarynyń ashylý saltanaty 26 shildede ótti. Tórt saǵatqa sozylǵan saltanatty jıyn alǵash ret ashyq aspan astynda Sena ózeniniń janynda uıymdastyryldy. 206 elden jınalǵan sportshylar quramasy barj sherýine qatysyp, áıgili juldyzdar Selın Dıon men Ledı Gaganyń ónerin tamashalady. Alaıda ashylý saltanaty Leonardo da Vınchıdiń «Sońǵy keshki as» kartınasyna jasalǵan «sátsiz» parodııasymen kórermenderdiń esinde qaldy.
Kartınadaǵy kórinisti uqsatýǵa tyrysqan sýretshiler ústeldiń ornyna podıýmdy beınelegen. Sondaı-aq, dreg-sýretshi Fılıpp Ketrın kók grek qudaıy Dıonıs keıpinde óner kórsetti. Ol óz áninde zorlyq-zombylyqsyz, beıbit ómirge shaqyrdy. Alaıda atalmysh qoıylym kópshiliktiń synyna ushyrap, jurt ony hrıstıandyq qundylyqtardy qorlaý retinde qabyldady.
Parıj Olımpıadasynyń uıymdastyrý komıteti saltanatty sharadaǵy daý týdyrǵan bul qoıylym úshin keshirim surady.
«EŃBEKTEGEN BALADAN, EŃKEIGEN QARTQA DEIIN»
Parıjdegi jazǵy Olımpıada oıyndarynyń eń jas qatysýshysy 11 jastaǵy qytaılyq Chjen Haohao boldy. Tamyzda 12 jasqa tolatyn jetkinshek skeıtbort týrnırinen synǵa tústi. Chjen jazǵy Olımpıada irikteýinde 51,73 upaı jınap, 44 qatysýshy ishinde 20-oryn alǵan.
Al Olımpıadadaǵy eń egde sportshynyń jasy – 65-te. Ol - ıspanııalyq shabandoz Hýan Antonıo Hımenes. Buǵan deıin ol 2004 jyly Afınadaǵy Olımpıadada kúmis alǵan bolatyn. Bul joly Ispanııa ókili nebári 13-orynǵa taban tiredi.
JAŃA ÓMIRGE QADAM
Parıj – mahabbat qalasy. Bıyl Olımpıadada sporttyq jeńistermen qatar jańa ómirge qadam basqan mahabbat kórinisterine de kýá boldyq. Franııalyq jeńilatlet arý Alıs Fıno ǵashyqtar qalasynda óziniń toǵyz jyl júrgen súıiktisine sóz saldy. Ol "máre syzyǵyn keskennen keıin kóp kútpeı ózim usynys jasaıyn dep sheshtim" deıdi. Ol márege tórtinshi bolyp keldi. Ol óz suhbatynda "toǵyz mınýttyń ishinde júgirip shyqsam sóz salamyn dedim. Toǵyz degen maǵan sáttilik ákeletin san. Biz toǵyz jyldan beri birgemiz. "Parıjdegi mahabbat" dep jazylǵan ilgekti syıladym", – dedi sportshy.
Tokıo Olımpıadasynyń kúmis júldegeri, Qytaı sportshysy Lıý Iýıchen de Parıjdegi Olımpıadanyń altyn medalin ıelengen Qytaı badmıntonshysy Hýan Iaıýnǵa tizerlep turyp, usynys jasady.
«TÚRIK KILLERI» MEN «DORAMALYQ ARÝ»
Túrik mergeni Iýsýf Dıkechtiń Olımpıada oıyndaryndaǵy erekshe óner kórsetýi áleýmettik jelide úlken tanymaldylyqqa ıe boldy. Eshqandaı da arnaıy qurylǵylar paıdalanbaı nysana kózdeýde baq synap, kúmis medal ıelengen Dıkechti kópshilik «túrik kılleri» dep atap ketti.
Káris mergeni Kım E Djı pnevmatıkalyq tapanshadan 10 metrden nysana kózdep, kúmis júldege qol jetkizip, kórermendi súısindirdi. Kópshilikti qyzdyń «qylyqtylyǵy» tań qaldyrdy. Kım E Djıdi jeli qoldanýshylar «doramalyq arý» dep atap, oǵan «kúlimsiregen óltirýshi» degen laqap at qoıdy. Al Ilon Mask tipti Kımniń mindetti túrde ekshn fılminde oınaýy kerek ekenin aıtty.
ÁIELDER BOKSYNDAǴY «ERLER»
Aljırlik boksshy Iman Helıf ıtalııalyq sportshy Andjela Karınımen bolǵan jekpe-jeginen soń jurt synyna ushyrady. Syrtqy kelbetine qarap jurt Helıfti transgender dep atap, áıelder boksyndaǵy ádiletsizdik týraly jar saldy.
Daýǵa aınalǵan qaýesetten keıin onyń otbasy qyzdarynyń kishkentaı kezindegi fotolaryn júktep, kópshilikti jalǵan aqparatqa senbeýge shaqyrdy. Al Iman Helıf 66 kelige deıingi salmaqta Olımpıadalyq týrnırdiń fınaldyq kezdesýinde Qytaı Halyq Respýblıkasynyń ókili Ian Lıýdi jeńip, altyn medaldi jeńip aldy.
Bokstan 57 kelige deıingi salmaqta altyn medal alǵan naıvandyq sportshy Lın Iýtın de genderlik janjaldyń qurbany boldy.
Buǵan deıin Iman Helıf pen Lın Iýtın eki ret genderlik testileýden ótpegendikten Ystambul men Nıý-Delıde ótken álem chempıonattaryna qatysýdan shettetilgen bolatyn, onyń egjeı-tegjeıleri áli ashylmaǵan.
JÚKTI SPORTShYLAR
Egıpettik semserlesýshi Nada Hafez qursaǵyndaǵy jeti aılyq balasymen Olımpıadaǵa qatysyp, 1/8 fınalǵa deıin jetti. Úsh márte Olımpıada oıyndaryna qatysqan jas ana osy jolǵynyń jóni bólek deıdi. Ol óz suhbatynda «eki adam semserleskenimen, úsh adam saıysqa tústi» -deıdi.
Sonymen qatar, sadaq atýdan synǵa túsken ázerbaıjandyq mergen Iaılagıýl Ramazanovanyń da qursaǵynda jeti aılyq balasy bolǵan. Ol ózin qoldap jatqan jankúıerlerge alǵysyn bildirdi. Ol aıaǵy aýyr bolyp júrip Olımpıadaǵa daıyndalý ońaı bolmaǵanyn jáne óziniń jarystaǵy nátıjesine kóńili tolmaǵanyn aıtty.
TARIHI JEŃISTER
Kýbalyq balýan Mıjaın Lopes Nýnes Parıj oıyndarynyń fınalynda Iasmanı Akostany ońaı jeńip (6:0) bes dúrkin Olımpıada chempıony atanyp, tarıhı mansabyn támamdady. Bıylǵa Olımpıadadaǵy jeńisinen soń Nýnes boz kilemge aıaq kıimin sheship, jurtshylyqtyń qurmetine bólendi.
Serbııalyq ataqty tennısshi, «Úlken shlem» týrnıriniń 24 dúrkin jeńimpazy 37 jastaǵy Novak Djokovıch bıylǵy Olımpıadada altyn medal ıelenip, tarıhta óz esimin altyn árippen qaldyrdy. Djokovıch Olımpıada oıyndaryna bes márte qatysyp, aqyry Parıjde degenine jetip, chempıon atandy.
Dına Lıtpın
«Adyrna» ulttyq portaly
